ZALEN, Mar. 27, 2025: Chief Minister Lalduhoma chuan MLA leh MP lo ni tawh thinte chu ‘inthlahrung lova thu rawn tha pe fo turin’ a sawm.

Lalduhoma hian Ningani khan Mizoram MLA leh MP lo ni tawhte awmna pawl, Former Legislators’ Association of Mizoram (FLAM)-in Mizoram Legislative Assembly Annexe Conference Hall-a general body meeting a hmanpui.

Ram hruaitu hluite chu kum lamah lo upain an taksate chak lo hle tawh mah se, ram leh mipui tan tih theih an la nei tih sawiin, “Thangtharte hnenah kawng dik min kawhhmuh zel ula. Keini MLA ni laite pawh hi inthlahrung hauh lovin thurawn tha pe fo rawh u,” a ti.

Chief minister hian ram lo hruai tawh thinte chu an thawhrimna fakin, “Ram buai avangin kum 20 zet hmasawnna hna kalpui hlei thei lovin kan awm a. Chutichung chuan vawiinah hian hmasawn chak pawl tak state kan ni a. Hei hi kan MLA lo ni tawh thinte thawhrim rah a ni,” a ti.

Lalduhoma hian mawi tak leh zahawm taka house-a senior-te an lo awm thin vangin vawiin thlengin MLA ni laite nungchang pawh a mawi zui nia a hriat thu a sawi a, tun hnaia hnam dang tih dan tha lo an ching chu tha lo leh kristian atana mawi lo nia a hriat thu a sawi bawk.

FLAM member-te chu an taksa leh rilru hriselna vawng thaa rei tak dam turin duhsakna a hlan bawk.

FLAM President Liansuama pawhin sorkarin MR bill tha zawk a siamsak avangin an lawm hle tih a sawi.

Kum 1994-a din FLAM-ah hian member 117 leh associate member (MLA/MP hlui thi tawhte aiawhtu an nupuite) 59 an awm a. An zinga pahnih - Rothangi w/o Ch. Chhunga leh Nghakliani w/o Lalrinliana Dawrpui chuan kumina kum 100 an tlin chawimawina an hlan.

General body meeting hi an pawl vice president, Prof JV Hluna’n a kaihruai a, kum 2024-25 chhungin an member thi pathum sunna hun an hmang a. General secretary leh treasurer ten report an pe bawk.