ZALEN May 7, 2025 : Social Welfare Department leh Tlawmngai Pawl Foundation For Drug-Free Mizoram te tangkawpin vawiin chawhma khan Siaha district-ah Ruihhlo laka fihlim tura beihpui thlak a ni a. Foundation For Drug-Free Mizoram hian an pawl indin atanga hmathlir an lo siam tawh angin Mizorama district headquarters an tlawhchhuak ta a ni.

Siaha Don Bosco School a hun hmanna ah hian zirlai mi 482 te ruihhlo laka fihlim turin an intiam a. Resource Person Dr. Zorinsangi hnen atangin ruihhlo laka fihlim tura inbuatsaih hun tha ber chu tun hun hi a ni tiin; thutlukna tha ber siam turin zirlaite a fuih a, mihring taksa, rilru leh thlarau thlenga khawih chhe thei ruihhlo malmak ngam tura mi huaisen ni turin a sawm.

Foundation For Drug-Free Mizoram chuan thuchhuah siamin, kum 6 chhung an pawl zinkawngah Mizorama district headquarters an tlawh chhuak thei ta chu an pawl tan mellung pawimawh tak a nih thu tarlangin; hemi hlawhtlinna tura Pathian hruaina an dawn leh Mizoram Sorkarin an hriatpuina ah leh Social Welfare Department, Health & Family Welfare Department leh Excise & Narcotics Department leh rawngbawlna hawnsak thin tute - School, College, Institution leh Kohhran tin te chungah leh mahni insengso a, penchhuak thin an Foundation Member, tlang leh mual hrang hranga awm te hnenah lawmthu an sawi a, an pawl kal zel nan Mizoram mipuite thlawpna leh duhsakna an ngen bawk.