ZALEN December 8, 2024 : Aizawl Municipal Corporation (AMC)-in an huam chhunga dawr, restaurant leh hotel an endik kaihhnawihah November, 2024 chhung khan dawr hawn thar dilna 368 leh tihnun (renew) dilna 235 an dawng.

AMC Board of Councillors meeting-in dawr, restaurant leh hotel-te enfiah tura a din, Committee on Regulations of Restaurants, Hotel & Hostel Chairman Rosiamngheta’n ZALEN a hrilh danin hmun hrang hrang an endiknaah fa thianghlimna chungchang te, registration an nei em tih te, an registration a nung em, bawlhhlawh an thliar tha em tih leh thil pawimawh dangte an endik tih a sawi.

Hmalakna hi kalpui zel an tum tih sawiin hetianga dan zawm lote chu Rs. 5,000 thleng pawisa chawitir theih an nih bakah an dawr khar thlenga hrem theih an ni tih a sawi bawk.

AMC chhinchhiah danin tun hnaia in-register-ten registration an tih hma khan Aizawl khawpui huam chhungah thingpui dawr (restaurant) 819, hotel 148 leh hostel 148 in-register an awm a ni.