ZALEN May 19, 2025; Social Welfare minister Lalrinpuiin dan hnuaiah Drugs De-Addiction Center/Rehabilitation Center ten sawrkarah accreditation an tih vek a ngai tawh dawn tih sawiin, dan zawm lo tan center din theih a ni tawh dawn lo niin a sawi.

Vawiin chawhnu dar 1 khan a office-ah thuthar thehdarhtute kawmin Social Welfare minister chuan, sawrkarin dan a neih 'The Mizoram Drugs (Controlled Substance) Act, 2016' leh 'The Mizoram Drug Treatment cum Rehabilitation Center Accreditation Rules, 2019 (and its subsequent amendments)' hnuaiah Drugs De-Addiction Center/Rehabilitation Center ten sawrkar-ah accredication an tih vek a ngai tawh dawn tih a sawi a, he dan hnuaiah hian infrastructure, human resource, service, documentation etc. ah minimum standards siam niin hetiang zawm lo te tan center din emaw kalpui phal a ni tawh dawn lo tih a sawi.

Accrediation chu center te tihtawp tumna ngawr ngawr a ni lo tih sawi bawkin, "Center ten rualkhai zawk leh ruihhlo ngai ten enkawlna an mamawh ang tak an dawn theihna tura awmze nei taka enkawlna kalpuina tur a ni zawk," a ti.

"Sawrkar chuan center din a, an theih leh phak ang tawk tawka enkawlna lo kalpuite inpekna pawh a hriatpui tel bawk a, heng center ding sa te hian awmze nei taka enkawlna an kalpui chhunzawm theih nan kawng hrang hrangin puihna pek a inhuam thung, sum faia tanpuina bakah service pawimawh bik pek te pawh a tel dawn," social welfare minister chuan a ti bawk.