ZALEN June 2, 2025 :ZPM General Headquarters chuan vawiin khan an Party Office ah chhung inkhawm an hmang a, he huna thusawitu PWD Minister Vanlalhlanachuan, Eptu party ten sawrkar demna leh sawichhiatna tur ringawt zawng thin mah se, mipui thahnemngaite avanga chakna thar a neih leh thin thu a sawi.

PWD Minister Vanlalhlana chuan, “ZPM Party hian beihna nasa tak kan tawk fo a, mimal anga inbeihnate pawh ministry leh Party mite hian vawiin thlengin kan la tawk reng a, chhui chiana thu dik ni si lo, thudik hrula rin thu leh dawt tlem belhchhah hmangin mipui hnena hek kan tawk thin a. Chutih laia neutral mipuiten sawrkar hmalakna leh theihtawp chhuaha kan thil tha tihte min hriatpui thu leh hmalam pana kal zel tura min fuihnate hian chakna thar min pe leh thin a ni,” a ti.

PWD minister chuan, “Mizoram ah hian motor kal theihna kawng KM 6610 kan nei mek a, hengte hi Mizoram Sawrkar leh NHIDCL ten enkawlin, PMGSY hnuaiah KM 963 laih a ni a, Aizawl City ah hian Km 363 motor kal theihna kawng kan nei a ni. Aizawl hi kan khawpui ber leh kan ram hmel lanna a nih avangin ‘khawpui chhung kawngte hi a tha tur a ni’ tih hi sawrkar ngaih dan a ni a, theih tawpa hma kan lak mek laiin, Zuangtuia PWD Alkatra chhuanna khawl chu tihchhiat a ni a, engtikahnge hna kan chhunzawm leh theih ang tih pawh hi sawi lawk theih ni lo mahse, sawrkar chuan ngaihtuahna a seng leh mek a ni."

"Mipuite pawh sawrkar hmalakna tithuanawp zawnga hma la tawh lo turin kan ngen a ni. ALT Road pawh tha taka siam turin ruahmanna kan nei mek a, Aizawl leh thenzawl inkar kawng tha mahse Thenzawl to Lunglei Road hi a harsa zual lai a ni a, sawrkar pawhin ngaihtuahna nasa zawk a seng mek a ni,”a ti.

Transport Minister chuan, “State dangte hmasawnna hmuhin rualawh a na duh hle a, kan ramah erawh economy ah hmasawnin, lirtheite pawh lo pung zel mah se, kan khawpui chhung kawngte ruahmanna fel kan lo siam lo thin avangin traffic Jam a nasa thin hle a, hei hian Sawrkar leh mipui tan harsatna lian tak a thlen nasa hle a ni. Bawngkawn traffic Point hi nitin chawhrualin motor 34720 in an pal tlanga, Bazar bungkawn hi nitin Motor 53828 in an paltlanga, chutiang bawkin kawn hrang hrang lun laiahte hian traffic Jam a nasa em em thin a ni."

"Heng kan harsatnate sukiang tur hian theih tawpin ngaihtuahna kan senga, Sawrkar hmasaten angaihna an hriat tawh lo hi, Pathian rinchhan chungin hmalak dan kawng kan dap mek a ni. He Sawrkar hi Pathianin min hruai tih loh rual ani lo a, Four Lane chungchangah pawh, thil tih theih loha kan ngaih Double Compensation India rama la awm ngai lo Central Sawrkarin min pe ta tlat te kha thil mak a ni. Neutral mipuiten min tan hlein ka hria a, thinlung takin lawmthu ka sawi a, keini lam pawh vawiin thlengin kan thutiam angin Corruption ah kan la fihlim a, heng hi chunglam min hruaina ropui tak a ni,” a ti.