Aizawl: Health & Family Welfare Minister Dr. R.Lalthangliana chuan Zirtawpni khan Khanpui Sub-Centre, Khawruhlian PHC, Sesawng Sub-Centre leh Seling Sub-Centre te chu hrilhlawk lovin a tlawh thut a. Thawktute mamawh hrang hrang bakah Building leh Quarter sak that ngaite a hmunah a enfiah. Health Minister-in a tlawhna hmunah te hian sawrkar hmasa a an dawn ngai loh, MNF sawrkar tharah chuan damdawi quality tha hnianghnar taka an dawn thu an lo hrilh.

Minister chuan Khanpui Sub-Centre building, thli thawt zawnga nghing thei leh ruahsur laia tukverh leh inchung pawp atanga ruah lut thei chu a rang lama sak that anih tur thu sawiin, department lam pawh ruahmanna siam nghal turin a hrilh a. Khawruhlian PHC ni thin, Health & Welness-a hlankai mek pawh a enfiah nghal a, Doctor leh Nurse indaih lohna pawh a tul anga siamthat a la ngaih dawn thu a sawi.

Sesawng Sub-Centre a tlawh hi kum 1988-a sak daih tawh kha a ni a, a building a chhe tawh hle a, CTI leh Mualmam an la bial tel bawk a, remchang hmasa berah building leh quarter thar sak a tul thu a sawi. Seling Sub-Centre kum 1979 vela an lo sak tawh pawh a building a lo awngrawp tawh hle a, sak that tha a tih thu a sawi bawk.