ZALEN May 3, 2025 : Horticulture Department-in a Thiak a Centre of Excellence for Flowers dinna tura proposal a siam endik turin Holland atangin Ton Bakker, PUM Expert, Indo-Dutch Centre of Excellence for Flowers chuan a rawn tlawh.

Zirtawpni khan Horticulture Department hotute leh Mizorama Floriculture lama pawl lian pali - Zo-Anthurium Growers Co-Operative Society (ZAGCS), Mizoram Florist Association, Mizoram Bonsai Association leh Orchid Society of Mizoram hruaitute chu Directorate of Horticulture Committee Room-ah meeting a neih pui a, Rawtna leh ruahmanna an lo neihte an sawi ho a ni.

Ton Bakker-a hi Dt. 29.4.25 ah khan Aizawl lo thlengin, Horticulture Department-in a Centre of Excellence for Flowers atana hmun an lo rawt mek a endik bakah Mizorama pangpar chingtu pawl hrang hrangte hmalakna a hmunah ngei a enpui a, Florists Fair neih mekte pawh fangkualin Aizawl leh a chhehvela pangpar chinna hmun te a fangkual bawk a ni.

Meeting hi Horticulture Director C.H Lalmuanpuia, Director, Department kaihhruaina hnuaia neih niin, Centre of Excellence for Flowers neih na tura Horticulture Department in hma a lak mek dan te a sawi fiah. Expert lo kal, Ton Bakker-a chuan Horticulture Department leh pawl hrang hrang hmalakna fakin, hmasawn theihna lai tur te sawi ho a ni a, Mizoram in hmabak eng tak a neih thu a sawi. Emeylene Lalmawipuii, Dy. Director-in Mizoram floriculture dinhmun tlangpui sawi fiahna hun hmangin presentation a pe bawk a ni.