ZALEN June 25, 2025; Mizoramah e-Office hman a nih tawh avangin file a kal chak a, a awmreina dawhkan hmuh theih vek a ni tawh.

Vawiin chawhma dar 11 a thuthar thehdarhtute a kawmna-ah Information & Communication Technology (ICT) minister Dr. Vanlalthlanan he thu hi sawiin, e-Office hmangin file 6,429 siam a nih tawh thu leh chung file te chu vawi 63,565 a chet tawh thu a sawi.

ICT minister chuan e-Office hman a nih tawh avangin file a kal chak tih sawi bawkin, "A awmreina dawhkan hmuh theih vek a nih avangin, tuman file an kawl rei ngai lo," a ti a, file pawimawh te pawh in lamah leh zinna thlengin a en theih vek nia sawi bawkin, chu chu a bikin, minister, CS, Secretary leh Senior Officer ten an hmang tangkai niin a sawi.

File bo a awm theih tawh loh bakah, file ken kual a awm tawh loh avangin, confidentiality maintain nan pawh a tangkai tih ICT minister chuan sawi bawkin, paper hman a tlem tawh dawn avangin sawrkarin sum tam tak a hum thei dawn niin a sawi bawk.

#ZalenNews