Tun hnai khan chief minister Lalduhoma chuan Secretariat Conference Hall-ah Land Resources, Soil & Water Conservation Department hnathawh leh hmalakna thlirletna /enpuina (review meeting) a neihpui a. Department hrang hrang te hian an hnathawh thlirletna 'review meeeting' hi an nei fo thinin dan pangngai anga ti mai thin an ni a. Review meeting-ah hian an thawh chin leh hmabakte sawi hovin hmachhawp awmte thawh chhunzawm dan tur an rel thin a ni. He­tianga department ten an hnathawh thlirletna leh hmachhawp sawihona an neih thin hi thil tha tak a ni a, zawng chhang zel chi tak a ni.

Department hrang hrangte hian review meeting hi nei thin mahse chief minister hova hetiang hun hman hi thil awm zen zen lo tak a ni a. Hun kal tawh lam kan thlirkir chuan department hotulu te emaw a chang chuan a changtu minister ho te'n emaw neih thin a ni a, hei hian hnathawh kawngah chak zawka hma a lak tir thin avangin a khat tawka neih fo a tha a. Chief minister hova review meeting neih erawh thil thleng khat tak a niin tun ministry-ah chief minister in department engemaw zat an hmalak tawhna leh hma­chhawpte a enpui thin hi a lawmawm a, chhunzawm zel nise a tha hle.

Kan hriat angin kan state hotulu ber chief minister ho meuha review meeting neih hi sawi nep chi a ni lo a. Hun kal tawha department engemaw zat meeting a lo neihpui tawh ten an chhawr tangkai ngei a rinawm a, meeting la nei leh turte pawhin nasa zawka an lo in buatsaih a, kan ram hmasawnna tur an rel chhuah ngei a beisei awm a ni. He review meeting hi a chhawr tangkai thiam depart­ment chuan an hlawkpui ngei dawn a, chutih rualin chhawr tangkai thiam lo an awm erawh chuan thil pawi tak a ni thung ang. Kan ram hi state dangte ngaihtuah chuan hma­sawnna hnathawhna tur a la tam hle a, chuvangin hetiang inhmuh­khawmna hian sawrkar hmalak zelna turah rah tha a chhuah ngei a beisei awm a ni.

Review meeting a hmanpuinaah Chief minister hian review meeting a neihpui thin chu hna thawh chak leh hmel thar hmuh thuai thuai an duh vanga ti an nih thu sawiin review meeting chu thil dik lo zawnga buatsaih thin ni loin department hrang hrangte harsatna leh mamawhte hriat an duh vanga telpui a ni tih sawiin sawrkar hna­thawkten tha taka an thlawp a beisei tih a sawi a, sawrkar hnathawkte chu inthlahrung lova an harsatnate thlen thin turin a sawm bawk a ni. Chief minister hian rilru tha tak pu chung leh department hmasawn duhna avangin hetiang thu hi a sawi niin a lang a, chuvangin department hrang hrangte hian chhawr tangkai thiam se a duhawm hle.