Khawvelah hian hnam mawl apiang in zuk leh hmuam an ti nasa niin a lang a. India ram pawh han thlir ila hnam changkang ho aiin hnam chek hnawk kan tih mai zingah zuk leh hmuam hi a hluar a, chu mai ni lovin tih chin tawk pawh an hre lo deuh niin a lang. Zuk leh hmuam hi hrisel lohna min thlentu lian anih avangin kum tin May ni 31 hi zuk leh hmuam do ni atan hman thin a ni.

Mizote pawh hi changkang inti ve viau tawh mah ila kan changkang tawk lo a ni tih lantirna chu zuk leh hmuamah hian a ni. Mi chang­kang tak taka ngaih pawh hi a ruka sahdah hmuam, tuibur hmuam pung pung leh kuhva ei sen hem huam kan la tam hle mai a. Hetiang kan la duh chhung hi chuan kan la chang­kang tawk lo tihna a ni a, hmasawn kan la ngai hle tihna a ni.

Mizoramah mi thahnem­ngaite avangin zuk leh hmuam bansan an thahnem hle a. Chumai ni lovin a ti thinte pawhin inthlahrunna chang an hre chho zel a, hmasawnna chu engemaw chen a awm tihna a ni. Zep nak emaw tun hma deuhte kha chuan khawhar inah leh puipunna hmunahte khan zuk leh hmuam intheh a lar hle a. Khawhar inah te khan 'Bak vawmte pu thlam' an sawi ang maiin a khu chho ngun ngun thin anih kha. Tunah erawh chuan danin mipui punkhawmna hmuna meizuk a khap vang leh kan chhia leh tha hriatna avangin kan insum ta a, a lawmawm tak zet.

Meizuk lamah hian insum deuh mah ila zuk leh hmuam dang a ei chi kuhva, tiranga leh hmuam chi sahdah, tuibur leh thildangte a hluar thar hle a. Heng thil chi hrang hrang kan tih chhan hi a bul berah chuan kamhlei vang a ni awm e. Hnam dangte hian kam chhia hi an neih a rinawm loh a, Mizote erawh chuan 'Chaw eikham kam chhia' te kan nei bik tlat mai hi a zia lo hle. Chuvang chuan kan chakna atang hian a insum theih a, zuk leh hmuam ti lovin kan awm thei tihna a ni.

Kan hma lawkah hian zuk leh hmuam ti zirchianna 'GATS' neih a ni leh dawn a. Zirchianna Global Adult Tobacco Survey thawh 1-naah khan India rama zuk leh hmuam ti nasa ber state kan niin 67.2% in an ti anga chhut a ni a. GATS 2-ah erawh tlema hniamin 58.7% a ni thung a, GATS 3-ah hian hmasawnna awm zel thei se a duhawm hle. Engpawhnise zuk leh hmuam in kan sum leh pai min senral tir nasat zia leh kan hriselna a khawih pawizia hriat hian sim tura tanlak a pawimawh tak zet tih hre thar theuh teh ang u.