ZALEN June 26, 2025 : Excise leh Assam Rifles te chuan Zote, Champhai district-ah hmun hnih-ah Heroin No 4 an man a, Assam Rifles hian Bualte, Lunglei district-ah an man bawk. Hmun thuma Heroin an man hi cheng 1,52,22,000 man hu a ni.

Thu an dawn bawhzuiin Excise leh Assam Rifles te hian Zote-ah hian Mobile Vehicle Check Post (MVCP)-ah June 25, 2025 tlai 4:45 khan an rinhlelh hmeichhe pakhat kut atangin Heroin Hawng 2, gram 31.2 a rit chu an man a, an thil man hi cheng 23,40,000/- man hu a chhut a ni.

Zote, Champhai-ah vek hian an thudawn bawhzuii Mobile Vehicle Check Post (MVCP) siam leh a ni a, tukin zing dar 8:30 khan an rinhlelh Suzuki Grand Vitara (Regd No MZ 01 AC 6204) atangin Heroin No 4 hawng 9, gram 100.5 a rit, cheng 75,37,500/- man hu a chhut chu Excise leh Assam Rifles te hian an man leh a, a kaihnawih-ah hian mi pakhat man a ni a, dan anga hma a lak a nih theih nan heng an thil man te hi Excise hian an kutken nghal a ni.

Assam Rifles te hian June 25, 2025 zing khan an thudawn bawhzuiin Bualte, Lunglei district-ah mi pakhat kut atangin Heroin No. 4 gram 71.26 a rit chu an man a, an thil man hi cheng 53,44,500/- ni a chhut a ni a, a kaihnawih-ah hian K. Lalawmpuia s/o K. Lalvunga chu man a ni. Heroin leh a neitu a puh hi Lunglei Police kutah hlan a ni.