ZALEN May 26, 2025 : Nimin Pathianni khan Excise & Narcotics Department leh Central YMA hnuaia Ruihhlo dotu – Central Anti-Drugs Squad (CADS) te chuan Joint Operation neiin zan dar-ah 7:40 Phunchawng-ah Heroin gram 549 (Hawng 50) leh a neitu nia puh mi pahnih - C. Lalramnunmawii (37) d/o C. Lalremliana, Chanmari West, H/No. V-10(A), Aizawl leh Lalnunmawia (35) s/o Lalhmangaiha, Tuikual North, D Mual, Aizawl-a khawsa nia inchhalte an man a.

He thubuai chhuina kal zelah vawiin (Thawhtanni) dar 1:00 AM-ah Luangmual Industrial Complex-ah Heroin Kg 1 & Gram 549 (Hawng 140), Methamphetamine Kg 9 & Gram 817 man leh a ni a. Heng bakah hian ruihhlo phurhna atana an hman lirthei - TATA Yodha Regn No. MZ01 AB-4110 leh ruihhlo thila indawrna atana an hman mobile phone pahnih man sak an ni bawk.

Ruihhlo man zawng zawng hi Heroin Kg 2 & Gram 98 leh Methamphetamine Kg 9 & Gram 817 an ni. Ruihhlo vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni a, May 26, 2025 khan Special Court (NDPS Act), Aizawl District-ah hruai nghal an ni. Heng ruihhlote hnamdang hnena pek tur niin an sawi.

Kumin, 2025, May ni 26 thlenga Excise & Narcotics Department-in ruihhlo leh a kaihhnawih an man dan chu hetiang hi a ni:

Particulars UNIT Quantity

Heroin Kg 26.415

Ganja Kg 132.983

Opium Gram 945.000

Cough Syrup phial 1,748

Alprazolam tablet 23,572

Tramadol tablet 2,033

Methamphetamine Kg 67.179

Crystal Meth Kg 48.061