ZALEN June 17, 2025 : Dawrpui thlanmual-a kawng Mtr 98-a thui RCC flooring leh a sir lung rem, Rs. nuai 12 senga thawh chu June 17, 2025 zing khan Chhinga veng bialtu Pastor C. Zorammawia'n țawngțaia Pathian hnena a hlan hnuah, bialtu Executive Corporator B. Lalawmpuii"n a hawng.

He kawng hi AMC Ward IX Committee-in AMC property tax return (2024-2025) Rs. nuai 12 hmanga siam tura a tih a ni a. March ni 31, 2025 ah hna țanin, June ni 12, 2025 khan zawhfel a ni.

Kawng zau zawng ft. 10, a chhuat chhah zawng inch 4 a ni a. A zau zawng hi hmun țhenkhatah ft 9 leh a chhuat chhah zawng pawh hmun țhenkhatah inch 5 a tlinna lai te a awm. Kawng tawpah motor inherna, mtr 7-a zau, țha tak siam a ni bawk.

He hna viltu ten an sawi danin, he kawng siamna atan hian iron rod (10mm) tlawn 60, cement bag 291, Sairang balu trip 9 leh Langkaih balu țin 300, rora trip 8, rora (10mm) trip 1, boulder trip 7, cubic lung trip 18 (3900) leh tui ltr. 2000 - trip 11 an hmang a ni.

Bialtu Executive Corporator B Lalawmpui chuan kawng siam remtihsaktu Dawrpui Thlanmual Committee lawmthu hrilhin, hna viltute pawhin an vil țha nia a hriat avanga lawmawm a tih thu a sawi a. Property tax return chu mipui sum tlingkhawm, mipui tana țangkaia hman tur a nih thu leh veng engemawzatin an chhawr țangkai tur thil siamna atana hmanga, an puitlin ta chu lawmawm a tih thu a sawi.

Vantlang tana rotling tam thei ang ber siam leh din chu a tum a nih thu B Lalawmpuii chuan a sawi a. A bial chhung veng hrang hrang hruaitute pawh mipui vantlang tana țangkai tur thilah chuan a lakah inthlahrung lo tura chahin, a theih ang anga hmalakpui a inhuam thu a sawi bawk.

Kum 1910 ațanga hman țan Dawrpui thlanmual hi Dawrpui ațanga indang, veng dang engmawzatin an la țawmpui a. Dawrpui YMA kaihhruai thlanmual committee-ah a țawmpuitu vengtin aiawhte pawh telin, harsatna nei lovin, a enkawl kawngah te inlungrual takin tun thlengin kum 115 a upa thlanmual hi an la hmang a ni.

Dawrpui thlanmual-a kawng siam thar hawnna hun hi Thlanmual committee chairman, Dawrpui YMA President Lianzama Pachuau-in a kaihhruai a. Dawrpui Local Council leh YMA hruaitute bakah he thlanmual hmangtu veng hrang hrang hruaitute an tel bawk.