ZALEN May 5, 2025 : Chief Minister Lalduhoma chuan a office-ah Prof Fauzia A.A Arshi, Managing Director, FA Airlines a kawm a, Mizoram nena thawhhona tur ruahmanna an rawn neih te a sawipui. Anni lam hi chuan khualzin mai bakah Mizoram thar chhuah organic zau zawka zawrh leh Aizawl khawpui zauh hna emaw thlang thawh an inhuam thu an sawi.

Prof Fauzia Arshi hian, "Mizoram hi khualzin ten awlsam zawk a an tlawh theih nan te, Mizoram thar chhuah organic thlai zau zawka zawrh chhuah nan te, a tul ang zelin Aizawl khawpui zauh hna emaw khawpui thar din kawngah pawh, Mizoram sawrkar nena thawh dunna neih kan duh a. In tan sum leh pai senna tur thil a awm vak lo vang, sawrkar kha thawhpui kan duh a ni ber a, fund chu kan nei a ni," tiin Chief Minister hi a hrilh a ni.

Chief Minister hian, Cargo lama thawhhona neih hi tha ka ti a. In rawtna te chipchiar taka kan hriat hmasak a ngai a ni. Ziakin kimchang takin rawn thehluh ula a tha ang, tiin FA Airlines ten Mizoram sawrkar thawhpuia an sawmna hi a lo chhang a. Vawiin vek hian an ruahmanna te hi Vanlaldina Fanai, Commissioner, Chief Minister, GAD, Finance etc., hnenah chipchiarin an thlen dawn a ni.