Covid 19 hripui laka kan fihlim nan veng leh khaw hrang hrangin inkaih-hruaina kan siam a, hripui in min tihbuai loh nan khaw chhungah leh ramri ah kan duty a. A bikin ramri a duty te an ngawrh zual a, mahse tun dinhmunah chuan hna thawhna a tul vang leh fur a nih tak avangin ramri duty hi an chawlhsan nual a, hmun thenkhat ah erawh duty an la awm thung.

Kolasib district ah chuan ngawrh takin duty hi kalpui a la ni a, Kolasib Sub. Hqrs. President C.Liankunga chuan ramri hmun hrang hrangah an la duty chhunzawm zel tih a sawi a. "Duty hi chawlhsan chi a ni lo a, kan la chhunzawm zel a ni," a ti a. Sub Hqrs. YMA chuan a remchan anga duty te tlawh kualin an vil reng niin a sawi a. Phalna nei lova lut ru an hriat te chu quarantine centre-ah an dah zel niin a sawi bawk.

Champhai Sub Hqrs. YMA chuan ramria duty chu chawlh hrih an rel nia thudawn a niin ramri depa awm group leh branch hrang hrang te chu an chawl hrih. Vanhnuailiana group YMA President HC Lalthangkhuma chuan Sub Hqrs hruaitute thu angin duty an kalpui tawh lo tih Zalen a hrilh a, "Engemaw chen chu chawl hahdam hrih ang u an tih angin thaw kan la hrih a, kan kal zel dan tur chu kan hruaitu ten an la rel dawn a ni," a ti. Mizoram atanga Myanmar lama chho an awm an hriat loh thu sawiin hetih lai hian Myanmar atang chuan khawi kai velah emaw chuan bungrua nena lo lutru an awm nia an hriat thu a sawi thung. Champhai Sub Hqrs. YMA hnuaia mi Vanapa group YMA hruaitu pakhat chuan ngawrh takin duty an la kalpui niin a sawi a. "Myanmar nen hian Tiau kamah leilet neiin kan awmho a, hri mai bakah ruihtheih thil a lo luh kan hlauh avangin duty hi kan la chhunzawm zel a ni," a ti.

Mizoram khaw tlang lam Dampa group YMA President PC Robuanga chuan ramri ah chuan duty lo mah se, ramri bula khua te chu fimkhur tura an hrilh bakah a khat tawkin chanchin an zawt reng tih a sawi a. Ramri depa Task Force te kutah a venhim hna chu an dah nia sawiin VLTF te chu a theih ang angin sum leh pai hmangin an pui thin nia sawiin tun kar chho pawh hian ramri hi tlawh leh an tum niin Zalen a hrilh bawk.

Sangau lamah pawh Myanmar ramri ven hna Task Force ten an thawh thin chu an titawp hrih a, Sangau atanga thudawn danin Myanmar nena inkalpawhna pui ber Saisih ah chuan Police an duty a. Hmun danga inkalpawhna hmunah chuan tunlai hian tui a tam avangin inkalpawh theih a ni lova, chuvangin duty hi an kalpui hrih lo nia thudawn a ni. Siaha district lamah pawh a nawlpuia Myanmar ramri-a duty chu tihtawp hrih a niin hmun thenkhatah chuan duty an la awm tho niin an sawi.