Aizawl : Thenzawl Golf Course & Resort nimina hawn tum chu Guwahati lamah ruah a nasat avangin Helicopter a thlawk thei lo a, Golf Course & Resort hawng tura sawm Union Minister of State for Tourism Prahlad Singh Patel chuan he hmun a rawn pan theih tak loh avangin thulh a ni.

Ruahman ang chuan nimin tlai dar 2:30 khan Golf Course hi hawn tura ruahman a ni a, Chief Minister pawh he hun hmanpui tur hian Aizawl a chhuahsan hman a; mahse, a hmun hi chu a thleng hman chiah lo niin thu dawn a ni.

Thenzawl Golf Course & Resort hi Tourism Department chuan February 26, 2020 atang khan contractor kut atangin an enkawl tan a, a thawktu hi Canada company niin cheng nuai 644108 senga puitlin a ni a, Swadesh Darshan Scheme of Ministry of Tourism, Government of India sum hmanga siam a ni a, hmun khata Mizoram sawrkarin tourism-a sum a hman hnemna ber a ni.

North East-ah Thenzawl Golf Course & Resort tlukpui hi a awm lo a, 18 hole international design a ni a, he hmunah hian Convention Centre / Tourist Reception Center / Cafe, Thirty number fully furnished Log Huts, Food Court, Watch Tower, Open Air Theater te awmin tunah hian Eco Park chu sak mek a ni bawk.

March 2018 atanga sak tan kha niin, Tourism department-in an lak hnu hian a luh manah mi pakhat zelah cheng 500/- lak a ni a, a chhunga motor chuan kual man chu a hrana lak a ni bawk. Tunah hian a duh tan tlawh theih a nih bakah zan pawh riah theih a ni a, cottage pakhat zel riah man hi cheng sang li a ni.