ZALEN July 11, 2025 Vawiin khan Central YMA hruaituten Mizoram Universal Health Care Scheme ( MUHCS) chungchangah Health Minister Lalrinpuii an kawm a, CYMA chuan sawrkar leh NGHAM inkarah hmala tura an inhawn reng thu an hrilh. 

Central YMA Committee sang, Central Executive Committee ( CEC) in a lo rel tawh angin Health Care scheme chungchangah Mizoram sawrkar leh Non- Government Hospital Association Mizoram (NGHAM) te inremlohna avanga mipuiin harsatna an tawh mek te thlirin hruaituten hma an la a. 

Vawiina inkawmnaah hian MUHCS chungchanga Sawrkar ruahmanna te Health Minister hian a sawi a, NGHAM nena inkara thil hriat fiah loh awm te sawifiahin sawrkar chu biak theihin a inhawng reng a, mipuiin an tawrh lohna tura hma an lak mek thu a sawi.

Central YMA hruaitute hian mipuiin an tawrh zel lohna tura Sawrkar leh Private Hospital neitute chu inhawng tak ve ve chunga sawiho zel turin an ngen a, mipui tana tha ber ngaihtuaha hma la turin an ngen. A tul a nih chuan Central YMA chu hma la tura a inhawn reng thu an sawi bawk.

Central YMA hruaitute hian karhmasa Zirtawpni khan Private Hospital neitute, Non- Government Hospital Association Mizoram ( NGHAM) hruaitute an lo kawm tawh bawk a ni. 

Vawiina Central YMA hruaituten Health Minister an kawmnaah hian Health Minister hi Health Secretary, Finance Secretary leh MUHCS CEO leh official dang ten an tawiawm a. Central YMA te hi President Pu Lalhmachhuana leh OB dangte an tel.