ZALEN July 14, 2025 : Mizoram Excise & Narcotics Department-in a chhinchhiah danin Mizorama damdawi hmansual avanga thihna thlentu tam ber chu Spasmo Proxyvon/ Parvon Spas a ni a, 1984 atanga July 2, 2025 thlengin mi 1161 in he damdawi hmansual avang hian nunna an chan tawh a, Heroin vanga thi hi 281 an awm tawh bawk.

Excise & Narcotics Department-in July 2, 2025 thlenga Drug Related Death Statistic a tihchhuah tharah Mizoramah damdawi kaihhnawiha thihna hi 1984 khan a vawikhatna atan a thleng a, hei hi mipa niin 1989 khan a vawikhatna atan hmeichhe pakhat damdawi hmansual avangin a thi.

E&ND in damdawi hmasual avanga thihna thlen tawh dan chhinchhiahna July 2, 2025-a a tihchhuaha a landanin Mizoramah mi 1912 an thi tawh a, heng zinga 1681 te chu mipa niin, 231 te chu hmeichhia an ni. Proxyvon vanga thi hi 1161 niin Heroin vang thi 281 an ni.

Kum khat chhunga damdawi hmansualin thihna a thlen tam ber tum chu 2004 kum niin mi 143 an thi a, hemi kum hi Proxyvon hluar lai kha a ni a, thi zinga 132 te hi Proxyvon vanga thi an ni a.

Ruihhlo dang, Alprazolam, Cataspa, Corazepam, Cough, Syrup, Dendrite, Diazepam, Ganja, Nitrosun, Pacitane (pepe), Parvon Spas, Peptica, Respira D, Liquor, codeine, damdawiin mum hrim hrim ei vang leh engvang bera thi nge tih an hriat loh vangin mi 470 an thi bawk.

Pic - Google photo