ZALEN July 11, 2025 MZP General Headquarters Executive Meeting vawi 645 na (2023-2025 term-ah vawi 23) na chu vawiin khan MZP Pisapui (President Room) ah an thukhawm a. MZP rorelna sang ber dawttu Federal council sitting vawi 59-na Agenda thlitfimna, Mizoram chhunga hnamdang (vai) huangtau ta lutuk chungchang leh pawl chhung thil pawimawh hrang hrangte rel a ni. 

Meeting hi President H. Lalthianghlima'n a kaihruai a, Meeting chuan, Mizoram chhunga Hnamdang (vai) mistiri leh diklo taka mizo hming hawh a sumdawngte chu a tul anga dapchhuah a hmalak a rel a. Tunlai a vai mistiri-te hnathawh dan zirchianna neih a; Contractor ang maia hnathawh an tum leh, a chhawr tute duh dan aia hnam dangte duhdan Mizo mipuiten kan zawm dual mai hi tih tawp a nih theih nan hmalak nise an ti.   

Meeting chuan, July ni 16, 2025 (Nilaini) a neih tur MZP rolrelna sang ber dawttu Federal Council Sitting vawi 59-na Agenda atan heng a hnuaia tarlante hi a pawm:-

1. Sairang thleng a rel a lo luh dawn avangin, Mizoram chhunga rel tlan na kawng zawng zawngah ILP checkpoint siam a nih theih nan MZP in hma la rawh se.

2. NHIDCL hnathawh hi a that tawk loh thin avangin, MZP in a that zawk theih nan hma la rawh se.

3. Zofa hnam inkhawmpui lian "ZOFEST" hi 2026-ah neih leh ni rawh se.

MZP chuan, College zirlaite tan Inter-College Basketball Tournament, 8/9 Ball Pool Championship leh Debate Competition chu kum 2025 chhung hian siam a tum a, College zawng zawng he inelna ah hian lo tel vek turin a sawm a ni.