ZALEN May 18, 2025 : Aizawl khawpuiah hnianghnar taka tui sem turin ni khatah tui 37 atanga 40 mld (million liters per day) pump chhuah a ngai a. Tun hnaia Aizawl khawpui chawmtu, Tlawng a nut chhan leh pump theih loha a awm chhan chu hmasawnna hna chi hrang hrang thawh vang a ni.

ZALEN zawhna chhangin PHE department thawktute chuan tun dinhmunah Greater Aizawl Water Supply Scheme (GAWSS) Phase I atangin ni tin tui 10mld, phase II atangin 19mld leh phase III atangin 8mld vel chawhrualin an pump thin tih an sawi.

Tluang taka tui pump theih a nih chuan tui sem kawngah harsatna lian an tawk lem lo nia sawiin, “Tui sem rotation pangngaia kalpui tur chuan ni tin tui 37-40mld vel a ngai a, chutihrualin tui hi heti zat pump thei ringawt mah ila thawktu indaih lohna leh a semna line chhiate a awm thin avangin kan ruahman ang diak diak chuan kan sem theih loh chang a awm fo,” an ti.

Tun dinhmunah phase I leh phase II atang hian hei bak tui pump tam a har tawh tih an sawi a, phase III atang erawh chuan a la theih tih an sawi a, “GAWSS Phase III hian ni tin tui 37mld pump chhuak thei tura duan a ni a; mahse, a dahna tuizem awm loh vang te, a semna line siam a la ngaih vang te-in a pump theih tawk ang hi kan la pump thei lo a. SASCI sum hmangin pipe lian phum kan tum mek a, a distribution line pawh siam that kan tum mek bawk a. Hengte hi kan zo thei a nih chuan hun eng emaw chen chu Aizawl hian tui kan hnianghnar thei turah kan ngai a ni,” an ti.

Tun dinhmunah phase III-in a chawm tur tam tak chu phase I leh II atangin an la pe niin an sawi bawk.

Tlawng lui tui nut chhan ber zawhna chhangin PHE thawktute chuan hmun hrang hranga hmasawnna hnathawh chu niin an sawi a. “Aizawl khawpui chhungah in hmun leh lei laih a tam a, hei bakah kawng lai leh thil dang hnathawhna kha ruah bawhawk a lo surin Tlawng a luhpui a. Thlitfim theih loh khawpin a lo nu ta thin a, hetiang a nih chuan nghah a ngaiin tui pump theih a ni lo a, chu chu mipuiten an tuar ta thin a ni,” an ti.

Tun hnai ruah baw hawk surah Tlawng tui chu a nu hle tih sawi bawkin, “Tui nu tehna NTU (Nephelometric Turbidity Unit)-ah 982-te niin a chang phei chuan teh hleih theih loh khawpte a ni a, heti khawpa a nut hi chuan pump chi a ni lo a ni,” an ti.

Tui chu lo nu deuh pawh nise sawngbawl theih chin an nei tih sawi bawkin, “A chang hi chuan NTU 700 vel pawh han thlitfim nawk nawk chang kan nei a; mahse, hei pawh hi chirhdiak a tam chuan a buaithlakin tih theih loh chang pawh a awm a ni,” an ti bawk.

PHE thawktute chuan kuminah ruah a tlak hma vangin tui pump kawngah harsatna lian an tawk lo niin an sawi a. “Ruah tui kha kar khat velin tla tlai deuh se chuan tui a tlem tawh vangin harsatna tawk thei kan ni a. Kan tui pump-na chhaka tui khuah ‘Temporary Barrage’ kan siam kha ni 2/1 chu kan hmang hman tawh a; mahse, ruah tui a tlak tak avangin kumin bikah chuan harsatna lian kan tawk lem lo,” an ti bawk.