ZALEN May 15, 2025 : Vawiin chawhnu khan Home Minister K Sapdanga hoin tunlaia Aizawl khawpui himna chungchang sawiho a ni a; Police Department, Excise and Narcotics Department, Social Welfare Department hotute leh Central YMA hruaitute an tel.

Home Minister office-a thut khawmnaah hian tun hnaia Aizawl khawpuia ruihhlo ti thin khawlaia veivak tam thu te, ruihhlo avanga thihna thleng leh mipui nawlpui himna lam sawiho a ni a; Tawngtai Bethel Camping Centre atanga vawi leh khata tam tham tak chhuak avanga harsatna awm theite pawh sawiho a ni.

Home Minister K Sapdanga chuan Aizawl khawpui himna turin Police, Excise leh Central YMA thawhona a pawimawh thu leh, an thawhho that avanga lawmawm a tih thu a sawi a; Aizawl khawpui boruak thlirin theihtawpa tan rual a tul thu a sawi.

Excise and Narcotics Department Minister Lalnghinglova Hmar chuan, sualna do kawngah sawrkarin theihtawp a chhuaha bakah Central YMA an rawn che chhuak thin chu lawmawm a tih thu a sawi rualin ruihhlo ti thinte avanga harsatna awm sut kian kawngah pawh Central YMA nena pheikhai rual taka an kal zel thei chu lawmawm a tih thu a sawi a. Tun hnaia Aizawl khawpui boruak thlirin inthlahdah loa tan rual zel a tul thu a sawi lang.

Aizawl SP Rex Zarzoliana Vanchhawng-in tun hnaia police-in Aizawl khawpui venhim hna an thawh dan report pein chhun zan zawma an duty thin thu a sawi a, tun hnaiah bik tan an lak nasat dante a sawi.

Excise and Narcotics Department Commissioner Z Lalhmangaiha'n an department-in tunlaia Aizawl khawpui leh district khawpui dangah zan lama special drive neia zu leh ruihhlo an ven dan te, tun hnaia ruihhlo man kawnga an hmalakna leh hmun pawimawh bika an duty thin dan report a pe.

Lalzarmawii, Commissioner & Secretary Social Welfare Department chuan Mizorama sawrkarin ruihhlo ngai enkawlna hmun a neih dan te, seat awm zat leh an enkawl mekte a report bakah ruihhlo ngai tam zawkte enkawl thei tura sawrkar ruahmanna neihte a sawi.

CYMA President Lalhmachhuana chuan khawtlang himna tura YMA hmalak mek dan te, ruihhlo do tura Central Anti Drugs Squad hnathawh dante report pein a tul angin Aizawl khawpuia branch hrang hrangin zan lama venhim hna an thawh dante a sawi a; CYMA hruaitu dangte pawhin khawpui himna tura hmalak mek leh rawtna an neihte an sawiho.

TBCC atanga chhuak tam tham tak an awm avangin venhim hna chak taka kalpui zel a tul thu sawiho a ni a, khawpui himna turin veng tina khawtlang hruaitute nen thawhhona tha neih a tul thu leh, kohhran hrang hrang pawh ruihho ngaite enkawl kawnga thawhpui thiam zel a ul thute sawi lan a ni.