ZALEN May 12, 2025 : MPCC Treasurer Lalmalsawma Nghaka chuan tun hnaia Hot Mix Plant Zuangtui Vengthar a halchhiat chu a hmunah kalchilhin a enfiah a, sawrkar chu mipuite harsatna sutkian sak thuai tur a duh thu a sawi.

Lalmalsawma Nghaka chuan Kawng siamna atana pawimawh tihchhiat a ni chu pawi a tih thu sawiin chutihrual chuan lirthei tak ngial pawh pollution certificate a nei lo a nih chuan mana pawisa chawitir a nih lai a, boruak tichhe nasa thei dan kalha sawrkar berin a kalpui tlat chu a dik thei lo a ti.

MPCC Treasurer chuan, "PWD Dept hian MPCB atangin Hot Mix Plant dah turin phalna an nei lo nia sawi a ni leh zel te dan bawhchhiatna a awm em tih sawrkar in endik turin kan duh a ni. Zuangtui mipui tena an nawr chung leh Pollution Control Board pawhin tum hnih lai thupek a pe tawh chunga PWD tena an zawm thei lo leh a hnu lama insawifiah tuma nasa taka chet an la chu a zia lo takzet," a ti.

"Mizoram Pollution Control Board staff te hi Adviser to CM pakhatin in na takin a vau let tih thawm te a thang leh zel a, Hot Mix Plan neitu Ms Sky builder te thlavang hauh ringawt lovin, mipuite harsatna tawh mek hi sut kian sak pui turin kan phut zawk a ni," a ti bawk

Lalmalsawma Nghaka chuan, "Zuangtui a ZPM Local Council hotute pawhin vawi engngemaw zat sawrkar leh an Bialtu MLA ngei hnenah pawh mipuite harsatna an thlen tawh tih hriat a ni a, mahse vawiin ni thlengin mipuite harsatna tawh mek hi enpui leh ngaihsak a la hlawh lo tih hriat a ni bawk. A Bialtu emaw Forest and Climate Change portfolio changtu hian a bial mipuite harsatna tawh mek hi chinfel sak turin kan phut a ni."

"Development hi a pawimawh a, heng Hot Mix Plant te pawh kawng siamthat zung zung nan a pawimawh hle tih kan hria. Mahse, mipui tana ninawm leh pawi thei lo zawk leh pollution titlem tura hmalakna te awm thei se kan ti hle mai," a ti bawk.