ZALEN June 24, 2025; Ruihhlo ngai leh awmna hmun neilote lo enkawl lailawkna Hulhliap (short stay) chu nimin atanga khan kalpui tan a ni a, mi 200 dah luh an ni.

Hulhliap Short Stay hi nimin khan batch khatna bultan niin mi 150 admit tum an nih laiin mamawhna avangin mi 200 chuang dah luh an ni a, social welfare minister Lalrinpuii chuan kohhran leh tlawmngai pawlte chungah lawmthu sawiin, Hulhliap Short Stay Centre chuan ruihhlo bawih a tang mek te tan nunthar an neih theihna hmun anih ngei theihna turin tawngtaina lamah hriatzui a pawimawh a ti a, a hlawhtlin ngei theihna turin tan la tlang zel turin kalkhawm te a sawm bawk.

Minister sawi danin he hmunah hian ni 10 chhung detoxing an ti ang a, ni 5 chhung psychological counselling an neihpui ang. Ni 5 dang synod revival camping center-ah an lut ang a, chumi zawhah chuan mahni in lama haw duhte chu hawn tir an nih dawn bakah centre a awm duhte chu an awm zuina tur ngaihtuah sak an ni dawn a ni.