Aizawl October 21, 2022 : Vawiin khan ZPM chuan an Secretary General Vanlalruata hovin chachinthar lakhawmtute an hmachhawn a, Zemabawk Local Council thiah taka inthlanna neih hun a ni tawh chunga inthlanna la buatsaih a nih lo leh Lunglei Municipal Council-a inthlanna an buatsaih har lutuk chu an hriatthiam loh thu leh ngam lo nia an ngaih thu an sawi.

ZPM Secretary General chuan, Chief Minister bial Zemabawk Local Council-ah MNF Member 4, Congress Member 2 leh ZPM Member 1 an awm a. MNF Member 1 leh Congress Member 1-in ZPM an zawm tak avangin ZPM-in Member 3, MNF in Member 3 leh Congress-in Member 1 an nei ta a.  Sawrkar siam thei an awm tak loh avangin dan angin Zemabawk Local Council chu August ni 16, 2022-ah thiah (dissolved) a ni," a ti. 

Local Council hi thiah (dissolved) anih chuan thiah a nih atanga ni sawmruk chhungin a thara inthlanna buatsaih leh tur a ni. August ni 16, 2022-ah thiah (dissolved) 4. Zemabawk Local Council hi Ni 60 a ral hnu October ni 16/2022 thlengin inthlang tura hmalakna pakhatmah hmuh tur a awm lo, tiin, Mizoram State Election Commission-ah General Administration Department (GAD) atangin inthlan buatsaih a ngaih thu engmah hriattirna a la awm lo niin kan hria a, a pawi kan ti hle, an ti bawk. 

"Chief Minister bial chhunga Vote tamna ber Zemabawk Local Council inthlan a hun taka buatsaih anih loh chhan a mawhphurtu, a kaikuang chu GAD changtu Chief Minister hi a ni.  Engvang nge a bial chhunga Local Council inthlan a ngam tak  loh tih hi  ZPM chuan kan zawt a, Zemabawk mipui ten enkawltu neilo a hei chen an awm hi a pawi kan tiin, kan lainat takzet a. Local Council inthlan hi a ranglama buatsaih thuai turin ZPM chuan kan phut a ni," Vanlaruata chuan a ti bawk.  

Sub-rule (2) of Rule 24 of Mizoram Municipalities Rules 2010-in a sawi angin Administrator atan Local Council huam chhunga mi chal lang (Prominent Citizen) dah tur a nih lai a Local Council inthlana MNF Ticket a tling zo lo Kapsanga Administrator atan dah a ni chu an hriatthiam lo thu an sawi bawk.

Lunglei Municipal Council chungchang pawh sawiin, ZPM chuan, "Mizoram sawrkar chuan Lunglei Municipal Council dinin kumin chhung ngeia inthlanna neih a ni ang tiin a changtu Dy Chief Minister-in vawihnih (2) ngawt mipui hmaah a puang tawh a.  ZPM chuan LMC Election Committee dinin inbuatsaihna  thui tak a kalpui tawh a.  Pathian leh mipui zarah sawrkarna lak ngei pawh kan beisei hle. Sawrkar-in LMC Electoral Roll pawh ni 14, October 2022-ah a ti chhuak tawh a. Amaherawhchu Lunglei kawngpui a chhiat lutuk avanga Sub-Hqrs YMA-in ni 18, October 2022 a nawrhna (no-vehicle day) an hman tak si avangin LMC inthlan buatsaih chu an ngam leh dawn lo niin kan hria a, a pawi kan ti takzet a ni," an ti.

ZPM chuan Lungtang leh Keifang Venglai-a Village Council inthlan neih tur pawh a rang lamin inthlanna sawrkarin buatsaih vat se an tih thu an sawi bawk a ni.