ZALEN June 20, 2025: Set Free Ministry, India-in Central Jail, Aizawl-a Graduation Programme a buatsaih chu vawiin khan Home Minister K. Sapdanga chuan khuallian niin a hmanpui.

He hunah hian K. Sapdanga chuan Jail-a hun hmang mekte tana Set Free Ministry-in zirtirna tha tak kalpuia, a hmawrbawkna ‘graduation programme’ a buatsaih chu lawmawm a tih thu a sawi a. Khawvel hmun hrang hrangah Jail chu “Prison & Correctional Centre” ti a hming thlak mek a nih thu tarlangin, Jail chu inhremna hmun ai mahin insiamthatna hmun a nih thu a sawi a. Jail-a awm mekte chu an thil tihsualin a delh behna atanga an thawh chhuah theih ngei nan, jail chu insiamthat nana hman tum theuh turin a fuih a. Home Minister chuan mihringte hi insiamthat ngai vek kan ni tih sawiin, Jail-a awmte pawh midang aia inngai hniam bik mai lova, nitin kawng khat tala insiamthat tum zel turin a chah a ni.

Set Free Ministry, India buatsaihin Jail-a awmte hi lehkhabu pahnih “Nunkawng dik” leh “Krista zalenna kailawn” hmangtein zirtirna pek an ni a. An zinga mi 163 exam hmachhawnte hnenah hian Graduation Certificate chu Khuallian K. Sapdanga’n a hlan a ni.