ZALEN June 13, 2025 : Vawiin hian Mizo Hnam Runah chhung inkhawm neih a ni a, he hunah hian General Secretary Lalremruata Chhangte chuan thu a sawi a. "Mizoram GST collection tlak hniam chhan Chief Minister-in sawifiah rawh se,” a ti a, a zawna thla nga chhung GST a tlanhniam chu thil pawi tak a nih thu a sawi bawk.

Lalremruata Chhangte chuan, “Kan State sum hmuhna hnar lian ber, sumdawngte leh contractor/ suppliers ten GST atanga sawrkara sum an chhun luh nikum 2024 aia kumin 2025 a zawna thla nga chhung a tla hniam hi thil pawi tak a ni. 2023 MLA inthlan hma-a ‘Keini chu kan danglam bik dawn,’ titu ZPM hian an sawrkar hnuah hei hi an zawm chiang hle mai. India ram State hrang hrang zingah record ṭha lo tak siamin a zawna thla nga chhung GST collection-a kum hmasa phalo awm chhun kan ni a, kan danglam bik chiang hle a ni,” a ti.

“GST atanga sum kan lakkhawm hi kumin hian 55 crores laiin kan pha lova, eng vanga heti em em a tlahniam nge a nih, tih hi a chhan kan zawn a ngai. MNF sawrkar laia hmasawnna hnathawhna tur, SASCI sum 233 crores an tih lapse atang ringawt pawh khan chhiah 41.94 crores sawrkarin a hmu let theih tur a hmuhloh phah. Tin, ZPM hian an sawrkar tuk atangin an duhsak zawng leh an party mite vulh nan Departmental works hmangin cheng nuai sang tel man hna an pe a, GST chhun luh a theih si lova, ram hmasawnna tur tam tak a bo phah a, chhiah lut a tlahniam a, hei hi a chhan lian ber pakhatah a ngaih theih bawk,” a ti bawk.

Maremruata chuan, "Kumin April ni 1 a hman ṭan, Mizoram Universal Health Care Scheme-ah in ziahluh hun hawn a nih mek lai, thla thum dawn a kal tawh chungin June 6, 2025 thleng khan mi 5159 chauhin ziak lut an la awm a. Damlote’n man chawi lo (cashless) a damdawiin an awm theihna tura kalpui a ni hi a lawmawm viau nain, ruahmanna an kalpui danah thil fel tawk lo a tam hle niin a lang. Hei vang hian mipuite pawh an la in ziak lut tha ngam lo kan ti thei ang,” a ti.

“Sawrkar hian Zoram mipui hmuha hming mawiah Policy zirchiang fumfe lovin hnawhsarum takin he MUHCS hi a kalpui niin a lang a. Kohhran leh Private Hospital te’n chhan hrang hrang avangin Sawrkar rate an zawm thei lova, cashless hman theihna sawrkar damdawiin ringawtin min dawl zo si lova, vawiin thlenga inremna a la awmtheih loh avangin dam lo thahnem takin kan tuar mek a ni," a ti.