ZALEN March 7, 2025 : Excise and Narcotics Department leh Narcotics Control Bureau (NCB), Aizawl te thawkdun chuan March 6, 2025 zan dar 9:00 khan Khatla, Aizawl-ah Crystal Methamphetamine Kg 48.061 leh a neitua puh mi pahnih an man.

Man te hi Munglamtuanga (33) S/o Tungbin Sian Khanlala, Hrianghmun, Ngopa, Champhai District, tuna Uttam Nagar, North Delhi District-a khawsa mek leh Joseph Hmangaihzuala (49) S/o Thangzaliana, Ramhlun South, Aizawl, tuna Bawngkawn Lunglei road, Aizawl-a khawsa mek nia inchhal an ni.

March 6 zan khan Durtlang Leitan-ah he case-a inhnamhnawih nia puh - Zalinthluaii (46) D/o Rinruma (L), Zokhawthar, Champhai District, tuna Durtlang Leitan-a khawsa mek nia inchhal chu an man bawk. Heng Crystal Methamphetamine an phurhna lirthei – Mahindra Sumo (Regn No. AS 16 E 0044) pawh hren nghal a ni. Crystal Methamphetamine man takte hi Delhi lama tihral tum mek a ni.

Crystal Methamphetamine vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni a, Vawiin March 7, 2025 khan Special Court (NDPS Act), Aizawl District-ah hruai an ni.