ZALEN, June 14, 2025: Mizorama kohhran thalai pawl lian ber, KTP huang chhunga member rual ni si lo leh hruaitu chanvo chelh ni si lova hriat hlawh ber pakhat, KTP General Conference-a vawi 30 dawn kal, Ngokama, Sesih chu Inrinni tlai khan a thi.

Ngokama hi kum 90 mi niin Inrinni tlai dar 05:15 khan a thi a, Pathianni chawhma dar 11:00-ah vui a ni ang.

A nupui, Niangzaawii’n a thihsan tawh a, fapa panga leh fanu pali an nei.

Ngokama hi KTP huang chhungah hian general conference-a a kal deuh ziah avangin hriat a hlawh hle a. KTP member-te inkhawmpui lian berah hian kum 1983-a Khawzawla nghah a nih atang khan a tel tan a, hetih lai hian KTP-a tel thei kum bithliah (kum 14 leh 40 inkar) a pel daih tawh nghe nghe.

Inkhawmpuia a tel hmasak ber atang hian kum 2020-a Serchhipa conference thleng khan vawi 27 a kal nia hriat a ni a. A kal tirh atanga a tawp thleng hian inkhawmpui lian hi vawi 30 (kum 2004 atangin kum khat danah neih thin a ni) a awm a, vawi thum chiah a kal lo tihna a ni.

Inkhawmpuiah hian KTP member rual ni lo chhimtu tlem zingah a tel deuh ziah avang leh Pathian faka lamtuala chhuak taima tak a nih avangin chhinchhiah leh hriat a hlawh hle a. Member tam tak pawhin an uiin a thih thu pawh hi KTP huangah chuan hriat darh a hlawh chak hle.

Ngokama hi general conference a kal taimak avang leh KTP a ngaihhlut em avangin Central KTP pawhin a ngai pawimawh hle a. Nikuma a damloh lai pawh khan Rs. 10,000-in a lo kan tawh nghe nghe.