ZALEN July 13, 2025: Kum chanve kalta, January atanga June inkar chhung khan Aizawl khawpuiah lirthei chesual vangin mi 10 an thi a, hliam 10 an awm bawk.

Aizawl Traffic thawktuten ZALEN an hrilh danin January-June, 2025 chhung hian Aizawl Traffic Police huam chhungah lirthei chetsualna hi tum 17 thlengin heng zinga tum 10-ah hian thihna a thleng a, tum thumah inhliamna awmin hliam tenau awmna pakhat leh inhliam awm lo chetsualna tum thum a thleng bawk. 

Lirthei chetsual chhan ber chu a khalhtu fimkhur loh vang liau liau a ni tih sawi bawkin, “Lirthei chetsualna chhanah hian a khawl lam fel loh vang emaw, a khalhtu hriselna dinhmun vang emaw, kawng dinhmun avang emawa chetsualna thleng a awm lo va. Chetsualna thlengte hi a khalhtu fimkhur loh vang liau liaua thleng niin heng zingah hian rui chunga lirthei khalh avanga accident thleng pahnih a awm a. Fimkhur taka lirthei khalha pumpelh theih vek a ni,” an ti.  

Lirthei chi hrang hrang chesual zat zawhna chhangin traffic thawktute chuan, “Lirthei chesual zawng zawng zingah hian two wheeler pakhat tih loh chu mahni maia tawhsual tawk ni lo vin lirthei dang nena insu, intai palh an ni a. Lirthei chetsualnaa lirthei hrang hrang inhnamhnawih dan chu two wheeler 17, LMV paruk, MMV pali leh HMV pali niin a vai hian 31 a ni,” an ti bawk.

January-June, 2025 chhung hian lirthei dan bawhchhia man 4,327 an awm bawk a. Heng zingah hian two wheeler tam berin 3,121 man a ni a, hei hi lirthei dan bawhchhia zawng zawng man atanga chhutin 72.12% a tling a ni.

Hei bakah hian lirthei dan bawhchhia HMV 102, MMV 39, LMV 804, bus 22, taxi 233 leh a dang pathum an awm bawk a. Dan bawhchhiate hnen atanga sum chawitir tlingkhawm hi Rs. 38,81,500 a tling a ni.

Lirthei dan bawhchhia thla tina Traffic Police-ten an man dan chu January-ah 499, February 708, March 619, April 715, May 774 leh June thlaah 1012 te an ni.

Lirthei chi hrang hrang dan bawhchhiatna langsar zualte chu MV rules bawhchhia 1,344, a hmun lova lirthei dah (no parking) 1,224, no turning 322, no entry 272, wrong side 240, driving license tel lova khalh 213, obstruct flow 185, dan zawm lo 172 leh helmet khum lo 142 te chu a langsar zual an ni.