ZALEN May 4, 2025 : Aizawl khawpuiah kum riat chhung lirthei intlanchhawk kalpui a ni tawh a, tihtawp tumna a la awm lo va. Hetihlai hian tun dinhmuna Mizorama lirthei awm zat chu 3,35,267 a tling tawh.

Aizawla lirthei intlanchhawk kalpui mek hi October 2, 2017 atanga kalpui tan niin lirthei number tawp ber zel chu calendar ni nen a inrualah an ding thin.

Tuna hman mek intlanchhawk dan hi June, 2019 atanga hman niin lirthei number tawpa 1&2 te Thawhtanniah an ding a, number 3&4-te Thawhlehniah, 5&6-te Nilainiah, 7&8-te Ninganiah dingin 9&0-te Zirtawpniah an ding thin a. Inrinni, Pathianni leh sawrkar holiday-ah chuan lirthei vai tlan theih a ni.

Taxi (four wheeler)-te hi March 1, 2016 atangin sticker A, B, C-ah thenin an intlanchhawk tan a, two wheeler taxi-te January 2023 atangin sticker A, B, C, D hmangin an intlanchhawk bawk.

City bus pawh tunah hian hmun ruka thena hmun khat zel ni khatah an ding mek bawk a, city bus-te hi kum 2010 hma lam atanga intlanchhawk tawh niin, tun thlengin city bus bik hi chu anmahni ruahmanna ang zelin an intlanchhawk.

Lirthei intlanchhawk kalpui a nih mek lai hian Mizoramah lirthei a pung mek zel a. April 30, 2025 thlenga Mizorama lirthei awm zat chu 3,35,267 a tling tawh a, chung zinga 2,31,403-te chu motor cycle/scooter niin, car 55,727 a awm tawh.