ZALEN December 8, 2024 : Aizawl khawpui chhunga police station hrang hrangte chuan tun hnai khan halpuah/halmawi Rs. 13,02,658 hu an man tawh a. Kumin hunpui lo thleng tur pualin December 23, 24 leh 31-ah te no vehicle zone siam leh tuma hmalak mek a ni.

ZALEN-in police hotute hnen atanga thu a dawn danin tun hnai khan Aizawl P/S hnuaiah halpuah leh halmawi Rs. 11,82,658 hu leh Vaivakawn P/S hnuaiah Rs. 1,20,000 hu manin he thila inhnamhnawih mi panga man an niin thubuai siamsak an ni.

Mipui chetvel awlsam zawk nan kum danga tih thin angin lirthei tlan phal loh hmun ‘no vehicle zone’ pawh Chanmari atanga Assam Rifles mandir inkarah siam leh tum a niin he thu buatsaih lai hian chief secretary remtihna nghah mek a ni.

Kristiante hunpui, Krismas leh kumthar lo thleng tur pual hian police chuan mipuite pui turin help desk hmun hnihah siamin khawlaia duty tur team 16, quick response duty bakah mobile patrolling duty tur an siam.

Aizawl Superintendent of Police Rex Zarzoliana Vanchhawng hnen atanga ZALEN thudawn danin help desk hi Aizawl new market area V. Lalliana in bul leh Israel Point-ah te siam tum a ni a. Hei bakah hian veng hrang hranga duty tur team 16 siam a ni bawk.

Aizawl khawpui chu hmun (zone) thumah thenin duty thin a ni ang a. Aizawl khawpui chhunga police station paliah a tul huna che chhuak thei tur quick response team siamin police station paliah bike dahin mobile patrolling neih thin tum a ni tih a sawi bawk a. Hunpui laia police suty tur hian armed batallion hrang hrang atangin sipai 100 chuang pawhkhawm tum a ni tih ZALEN a hrilh bawk.