ZALEN July 4, 2025 : Vawiin khan kum tling lova inneih khapna dan chungchang inhrilhhriatna, ‘Sensitization Programme on the Prohibition of Child Marriage Act, 2006 (PCMA) for Child Marriage Prohibition Officers (CMPOs)’ hawnna hun chu neih a ni a, National Family Health Survey (NFHS)-in Mizoram dinhmun a tarlan danin kum 15 hnuai raipuar kum hmasa aiin an pung.

State Hub for Empowerment of Women (SHEW), Directorate of Women & Child Development (WCD)-in Mission Shakti hnuaia hmalakna kal zela a buatsaih, I&PR Conference Hall, Lianchhiari Tun-a buatsaih a ni a, Mizoram State Legal Services Authority (MSLSA) Member Secretary Vincent Lalrokima chuan khualliam niin a hmanpui.

Prohibition of Child Marriage Act, 2006 hman a nih atang hian ‘child marriage’ awm zat hi a chanvein a tlahniam a. NFHS-5 atanga hmuh dan chuan 2006-ah khan child marriage hi 46% a awm a, 2019-21-ah chuan 23.3%-ah a tlahniam a ni. 

NFHS-5-in Mizoram dinhmun a tarlan dan chuan Hmeichhia kum 20-24 inkar, kum 18 tlin hmaa pasal nei 3.2% chu khawpui mi an ni a, 14% chu thingtlang an ni. Mipa kum 25-29 inkar, kum 21 tlin hmaa nupui nei zat 8.9% chu khawpui mi an ni a, 15.0% chu thingtlang mi an ni. 

Hmeichhia kum 15-19 inkar, survey neih laia fa nei tawh emaw raipuar mek zinga 2.1% chu khawpui mi an ni a, 6.9% chu thingtlang lam mi an ni. Kum khat chhunga hmeichhia kum 15-19, 1000 zela chhiara naupiang zat chu khawpuiah 9 niin thingtlangah 42 a ni.

Health Management Information System-a hmeichhe raipuar ziahluh thar zawng zawng zinga kum 15 hnuai lam rai zat chu 2023-24 ah 79 awmin, 2024-25 ah 193 an awm. Lawngtlai chu kum hnih chhunga kum 15 hnuailam raipuar tamna ber niin 2023-24 khan 11 an awm a, 2024-25 hian 67 an awm a ni.

Aizawl-ah kum hmasa lamin kum 15 hnuaia raipuar pathum an awm a, 2024-2025 ah 40 an awm. Lunglei-ah 2023-24-ah khan kum 15 hnuailam rai 24 an awm a, 2024-25 ah 20 an awm. A hnuaia mi hi district hrang hrang dinhmun a ni.

Dist.  - 2023-24  / 2024-25

Aizawl  - 3  / 40

Champhai  - 0  / 10

Hnahthial  - 1  / 5

Khawzawl  - 1  / 0

Kolasib  - 3  / 5

Lawngtlai  - 11  / 67

Lunglei  - 24  / 20

Mamit  - 9  / 12

Saitual  - 0  / 13

Serchhip  - 17  / 19

Siaha  - 10  / 2

State  - 79  / 193