ZALEN May 27, 2025 : Excise & Narcotics Department, Lawngtlai ten thla hnih chhunga tualchhung a siam, Zu an man, tualchhunga hralhna anga chhuta Rs. 17,60,000/- (Cheng Nuai 17 sing 6) man hu chu vawiin khan an paih.

The Lawngtlai Post-in a tarlan danin Officer in charge Lalrengpuia hovin an zu mansa te hi Lawngtlai-a an Office bul ah an paih a, an zu man hi kumin April leh May thla chhunga an man niin, Lawngtlai khawpuia an man vek niin fun 220 a vaiin Litres 2200 a ni. April leh May thla chhung hian Ganja Kg 4 Rs. 45,000/- man hu leh Heroin Rs. 30,000/- man hu an man bawk.

An zu paihna a tel Lawngtlai-a Chanchinbumite zawhna chhangin OC Lalrengpuia chuan Central Young Lai Association hnuaia ruihhlo dotute nen thawhhona thatak an nei tih sawiin, YLA chuan kawng hrang hrangin ruihhlo dona ah an thawhhlawk takzet a ti a, an hmalakna chu chhuanawm a tih thu a sawi a, Heroin pawh tualchhungah man tur a awm fo tih sawiin, a tamtham tak erawh man an neih loh laiin, Heroin ti thin ten tam tham lem lo, an mahni ruih tur tuak nana an zawrh chhawn erawh man tur a awm fo niin a sawi a, hengah pawh hian Young Lai Association chuan an thawhhlawk hle a ti.

Tun dinhmunah Excise & Narcotics Station Lawngtlai ah hian thawktu mi sawmpakhat an awm mek a, Lawngtlai District a zauvin, ramdang nen ramri thui tak nei a ni bawk nen, an chetveldan leh thawktu awmzat khaikhin thawktute chu an indaihlo a, thawktu tam zawk awmtheise an duh thu an sawi.