ZALEN June 16, 2025 : Vawiin khan Mizo Hnam Run chhung inkhawm hun hnihna - political session-ah MNF Vice President & Leader of Opposition Lalchhandama Ralte chuan thu a sawi a. MPCC President in a puhna te chhangletin, an hunlaia MR teacher an lak te dinhmun a sawi bawk.

Lalchhandama Ralte chuan tunhnaiah MPCC President-in MNF OB-te a beih chiam thu leh amah pawh mimal taka beih a nih dan a sawi a, MPCC President-in ‘Opposition Leader hi an sawrkar lai – Education Minister a nih lai khan sikul tihchangtlunna tur tam a lokal a. Heti zat hian thawk ula, heti zat hi ka chang ang, tiin thingtlang MNF hotute a hrilh a. Hei vang hian sikul tihchangtlunna tur angin a thawh theih loh a, room tam tak sak loh a awm a ni,’ tia puhna chu thudik a nih loh thu leh beih tham dinhmuna Pathianin a dintir avangin lawmawm a tih thu a sawi a. He inpuhna hi thudik a ni sela chuan ram rawngbawl zel tlaka a inngaih loh thu a sawi.

Leader of Opposition Chhantea chuan: “Politics-ah chuan ram tana hmasawnna tur kan sawi dawn emaw ka tih laiin, Congress president-in UT hunlai politics zia hmanga min bei chiam hi a puitling lo hle a. An zia hi hetiang a la nih reng chuan an kaihhruaite pawh an khawngaihthlak hle. Amah pawh hi ka khawngaih tak zet a ni,” a ti a. “Min puhna hi thudik ni se ram rawngbawl zel tlak ka ni lo tih ka pawm ang,” a ti.

Lalchhandama Ralte chuan harsatna tawk mek zirtirtu thenkhat chungchang a sawi bawk a. “Sawrkar hmasaa MR Teacher lakte kha, tam tak chu NIOS (open school) atanga D.El.Ed pass an ni a. Tuna MTET exam tura tih an nih hian harsatna an tawk chho mek a. Anniho chungah hian khawngaihna kan lantir deuh a ngai a, hun kan pek pawh a tha hle mai tih hi kan sawrkar hnenah pawh kan ngensak bawk a ni,” a ti.