ZALEN May 9, 2025 : Vawiin khan Vanapa Hall-a Education Department buatsaihin Mizoram Board of School Education Examination 2025 a Higher Secondary School Leaving Certificate (HSSLC) leh High School Leaving Certificate (HSLC) topper te chawimawina hun Chief Minister's Award 2025 hlanna neih a ni.

He huna khuallian Chief Minister Lalduhoma chuan, "Mizoram hi ziak leh chhiar thiam tamna state kan ni a, tunah hian report thar ber a lo chhuak dawn hnai a. India rama ziak leh chhiar thiam tamna ber state kan ni dawn niin kan hria. Ziak leh chhiar thiam tamna ber state, chhawr tlak lehkhathiam tlemna ni si – kan ni ang tih a hlauhawm a, chhawr tlak ngei nih i tum ang u," a ti.

Lalduhoma chuan, "Ramin resources a neih ropui ber chu human resource hi a ni a. Natural Resource lamah hausa mah ila mipuiten kan zir loh chuan kan chhawr tak tak thei chuang lo. Chutih laiin ram mipuite an fin var a, hriatna leh thiamna lama an san chuan, natural resource nei tha vak lo mah se ram dang atanga raw material-te lalutin ram hausa takah an indin chhuak thei tho thin," a ti bawk.

Chief Minister chuan, "Mobile Phone, Computer leh Smart TV hmanga i thil en te, i game khelh te khan – eng thil tha mah a pe tak tak lo che. Suangtuahna khawvelah nasa takin a chentir che a, a tak ramah a chang thei si lo va. Mi beidawngah a siam thei zawk che a ni. Hlawhtlinna leh hmasawnna hi ‘Click chhuah’ a ni lo va ‘Thawh chhuah’ zawk a ni. Mi hlawhtling ni tura i mamawh dik tak, i tih tur dik tak chu lehkha zir kha a ni a, chu kawng chu huai takin lo zawh ang che," a ti bawk.