ZALEN May 11, 2025: Mizoram chu hmarchhak state zingah lei hnuaia tui awm (ground water) nei chhe ber nia hriat a ni.

Irrigation & Water Resources Department thawktuten ZALEN an hrilh danin Mizoram lei chhunga tui awm zat chu zirchianna mumal tak a la awm loh avangin hriat chian a la ni lo tih an sawi.

Hetih lai hian Central Ground Water Board (CGWB)-in satellite leh ruah tui tla zat atanga formula an siam hmanga chhutin .22 billion cubic meter vel awm turah an ngai a, heng zinga .19 billion cubic meter hi lak chhuah theihah an ngai tih sawiin heng tui awm zinga 4% vel chauh lak chhuah a la ni tih ZALEN an hrilh.

Lei chhunga tui awm chu pawngpaw lak chhuah ngawt a him lo tih sawiin, “Kan neih chhun ang ang pawh awmze nei taka kan lak chhuah a ngai a, chuti lo chu kan tan a pawi thei a. Punjab leh Andra Pradesh state-ah chuan lak chhuah phal a ni tawh lo a ni,” an ti a. “Pumping test hmangin tui lak chhuah ngam zat a chhut theih a, heng test hi hmun thenkhatah tih tawh niin tih zel tum a ni,” an ti bawk.

IWRD thawktute chuan lei hnuaia tui awm zat chu muang changa la zirchian a, eng zat nge awm a, lak chhuah theih zat zirchian an tum mek tih an sawi bawk a. Mizoram lei chhunga tui awm tirtu ber chu ruah tui a ni tih sawiin lei chhunga tui hi hmun hniam/ruamah a awm ngawt bik lo a, hmun thenkhatah chuan tlang lamah te pawh a awm niin an sawi bawk.