ZALEN July 2, 2025; Mizoram Tipper Association Kolasib chuan Sairang - Kawnpui inkar kawng chhe zual siama hnatlang an neih chu titawpin nizan dar 8 atang khan lirthei te an tlan leh tan ta.

Kawnpui leh Sairang inkar (NH-306 leh 06) kawng chhe zual lai siamin MTA Dist Hqrs Kolasib huaihawtin June ni 26 atangin hnatlangpui neih a ni a, hnatlang hi nimin July ni 1 tlai khan tihtawp a ni a, nizan dar 8 ah lirthei tang khang za tel te chu chhuah an ni ta a ni.

MTA Dist Hqrs Kolasib chuan thuchhuah siamin kan chak lakna kawngpui ber hi lirthei bungraw phurte tan tlan a him lovin motor tam tak a tlu tawh a, motor tam takin a chhiat phah bawk a, thuneitu lamin tihngaihna ngang an hriat tak loh avangin lirtheia eizawng pawlte chuan hnatlangpui an ko ta mai a ni tih an tarlang a. Hnatlanna atana tha leh zung, sum leh pai leh lirthei thawhchhuahpuitu zawng zawng MTA Dist Hqrs, Kolasib, MTA Gen Hqrs Aizawl, AMCTA member te, Sub Hqrs YMA Kolasib, Awithangpa Group YMA, Khamrang khawtlang mipui, Kawnpui Town Drivers Association leh pawl hrang hrang te, mimal sum leh pai hmanga thlawpna an dawn avangin lawmthu an sawi.

Ni 30.6.2025 (Thawhtanni) khan PWD minister hmuh a ni a, thu lawmawm tak hriat tur erawh a awm lo tih sawiin, chutihrualin lung trip 40 an rawn thawh ve tur a sawi erawh lawmawm an tih thu leh heng lungte hi a rang thei ang bera kawng hnawh nana hmang tur leh hnatlan ngai kher lova a tul anga bawhzui tura an phut thu an tarlang.

#ZalenNews