ZALEN May 15, 2025 : Congress Thalai chuan PR a lo siam tawh angin kum 2023 MLA Election neih dawna ZPM MLA Candidate tur Vanapa Hall-a puan a nih tuma ZPM Leader Lalduhoma'n ZPM Party-in sawrkarna an siam chuan, "Ruihhlo ngaite enkawlna tur 'Community Healing Centre' UNO hriat tham, World Health Organisation nena tang tlanga din a nih tur thu," a sawi a. Ruihhlo ngaite mahni kea ding thei tur leh an hnathawh tur thlenga an siam sak tur thu uar takin a sawi a ni. Mahse, hei hi mipui bumna a nihzia a lang mek an ti.

December 8, 2024 khan Chief Minister Lalduhoma chuan Sakawrtuichhuna Tawngtai Bethel Camping Centre (TBCC) a tlawh tumin Mizorama Home hrang hranga enkawl mekte tan buhfai leh mamawh pek tihpun a tul tih a sawi bawk.

Hetianga Ruihhlo ngaite hmakhua ngai niawm taka hmalak dan tur nei anga insawi si khan Social Welfare Department hnuaia din Jordan Centre, Sethawn a awm, Kolasib Doctor-in an vil leh Nurse-in an awm chilh, Social Welfare Department hnuaia Central Fund an dil atanga enkawl chu ZPM sawrkarin mimal hnena hlan/hralh tumin hma a la a, mi tumahin an chhan loh avangin tih ngaihna hre lovin a ti tawp ta ngawt a ni, an ti.

Chief Minister a nih hlima hmalak sak a tum TBCC lah chu a ti kehchhe mek bawk. ZPM sawrkar hi mahni nihna ni lo anga lan tum, mahni nawmsakna atana neihsa hralh tum a ni tih a langchiang a. Tin, Chief Minister chuan motor pakhat bak a mamawh dawn lo; Motor manto ah a chuang lovang titu te'n an thutiam hi kil tin kil tanga an zawm lohzia a lang zelah Congress thalai chuan an ngai a, mipui an bum nasa hleah an ngai a ni.