ZALEN May 14, 2025 : Chief Minister Lalduhoma chuan vawiin khan Sairang Horticulture Centre-ah National Bamboo Missions Fund Nuai 252.826 senga din Bamboo Treatment & Seasoning Plant, Bamboo Depot & Godown leh Activated Charcoal Unit (Meihawl siamna) te a hawng. C. Lalsawivunga, Horticulture Minister chu khualzahawm a ni a, Prof Lalnilawma, Minister, RD leh H. Ginzalal, Technical Adviser to CM ten an telpui.

Chief Minister chuan, "National Bamboo Mission hmalakna hmanga Mau sawngbawlna thar kan nei ta hi a lawmawm kan ti a. Sawrkar enkawl factory leh plant te hi an dam chhuak tha lo thin hle mai a. Vawiina a unit hawn pawh hi Department lamin in enkawl phawt dawn a nih hmel a. Tha takin lo enkawl ula, tangkai takin hna lo thawk ngei se kan duh a ni," tiin tha taka enkawl ngei turin thawktute a chah.

C. H Lalmuanpuia, Director, Horticulture, Missions Director, State Bamboo Missions chuan technical report a pe a. Mau treatment & Seasoning Plant hi nget thei tawh lo tura mau sawngbawlna a ni a. Sawngbawl tawh chu kum 50 thleng a hman theih dawn niin a sawi.

Depot leh Godown hi a dah khawmna a ni a. Activated Charcoal Unit atang hian ni khatah meihawl ton 3 a siam theih a, kum khatah tonnes 900 siam chhuak thei tura beisei a ni. Nitin mau pum 670 vel a mamawh a, meihawl a siam rualin nitin vinegar litre 100 vel a siam chhuak ve nghal zel ang. Hman tlaka distilled hnuah phei chuan nitin vinegar fir tha Litre 54 vel a chhuak thei dawn a ni.

Mau chingtu tur hi Zau (cluster) pathum; Chhingchhip, Baktawng leh Saiphal khuaah te din an ni tawh bawk.

Heng mau sawngbawlna din kawngah hian North East Cane & Bamboo Development Council (NECBDC) ten technical support an pe a, a enkawl dan training pawh anni hian an pe vek dawn a ni.