ZALEN May 24, 2025 : May ni 13,2025 a Council of Ministers meeting chuan Civil Services (Combined Competitive) Examination ah optional paper awm tawh lo turin a rel a. An thurel ang hian MCS (Combined competitive) examination neih hmasak berah hman nghal a ni dawn.

ZALEN thudawn danin P&AR (GSW) chuan May ni 16,2025 khan MCS exam na tura notification thar hi a ti chhuak a. Ruahmanna thar ang chuan preliminary exam-ah paper 2 (multiple choice objective type) awmin chhan dik loh chuan mark paih (negative mark) a ni ang. Preliminary exam-ah hian General Studies leh Aptitude Test te neih a ni ang.

Main exam-ah hian general English leh General Essay bakah General Studies Paper I-V te a awm dawn a ni. Dan thar hman turah chuan General English paper-a candidate in 40% tal mark a hmuh loh chuan paper dang a chhanna hi endik a ni dawn lo a, mahse English-a mark hmuh hi a merit siam nan chhut tel a ni lo thung ang.

Dan thar hman tur chuan awlsamna a siam dawn nia sawiin Mizoram Public Service Commission (MPSC) a thawktu pakhat chuan, "Question setting leh evaluation hi a zangkhaiin hun a duh rei lo anga, a hmaa mi tam tak zawhna siam tira endik tir a ngai thin khan hun duh rei em em thin a. Hei mai bakah tha a ngai tlem tawh dawnin sawrkar sum tam tak a save thei dawn a. Chumai bakah GS Syllabus hi a zauin Mizoram chungchang hriatbel viau pawh a ngai tawh dawn a, zawhna inang vek hmanga inelna chu a fair leh zual bawk ang a, a quality viau dawn a ni,” a ti.