Mi 242 phur Air India thlawhna tla

ZALEN June 12, 2025 : Mi 242 phur Air India thlawhna chu Gujarat-a Ahmedabad bul, Meghaninagar-ah a thlawh chhuah hnu lawkah Ningani chawhnu khan a tla a. He chanchin ziah lai thleng hian thi leh hliam dinhmun hriat a ni rih lo.

News agency PTI-in thlawhna tumhmun atanga lak video a tihchhuahah chuan a tlaknaah hian a khu nasa hle.

Thuchhuah an siamah Air India thlawhna, Boeing 787-8 Dreamliner hi London-a Gatwick pan a ni tih an sawi a. “Flight AI171, Ahmedabad-London Gatwick inkar thlawk chu vawiin khan a chesual,” an ti a. “Tun dinhmunah chuan a kimchang engmah hriat theih a ni lo va, a chian hunah kan website leh X-ah tar lan a ni ang,” tiin tlai dar 03:00 vel khan an tar lang.

London Gatwick Airport pawhin thuchhuah siamin, “Ahmedabad Airport atanga London Gatwick-a tlai dar 06:25-a tum tur Flight AI171 chu vawiin khan a chesual,” an ti.

Civil Aviation Minister Ram Mohan Naidu pawhin Ahmedabad-a thlawhna tla chuan a barakhaihin pawi a ti hle tih a sawi.

“Kan inralring hle a. Kei pawhin ka ngaihven reng a, aviation leh rikruma che chhuak thin agency-te pawh che chhuaka hma la turin ka hriattir,” a ti.

Minister hian rescue team tirh tawh an ni a, damdawi thiam leh chhawmdawlna lam buaipuitu turte pawhin a hmun an thleng tawh tih a sawi a. “A chuangte leh an chhungte ka tawngtaipui,” a ti.

Thuneitute chuan thlawhna hi chawhnu dar 01.38-ah thlawk chhuakin minute nga hnu lekah a tla tih an sawi.

Mi 242 an chuang a, heng zingah hian a khalhtu pahnih leh thawktu dang (cabin crew) 10 an tel a. Capt Sumeet Sabharwal leh First Officer Clive Kundar ten an khalh a ni.

Mi chuang zinga 169 hi Indian an ni a, British 53, Canadian pakhat leh Portuguese pasarih an ni tih Air India chuan an sawi.

Tracking website Flightradar24 chuan thlawhna atanga signal an hmuh hnuhnung ber chu a thlawh chhuah atanga reilo teah niin feet 625-a sangah a nih thu an tar lang.

Union Home Minister Amit Shah chuan Gujarat Chief Minister Bhupendra Patel, state home minister leh police commissioner te a be nghal a. A tul chuan sorkar laipui atangin an pui thei reng tih a hrilh.

Chief Minister Patel-a chuan thuneitute chu chhanchhuah leh chhawm dawl hna thawkna leh hliam tuar enkawlna kawngah a rang thei ang bera che chhuak turin a ti.

“Hliam tuarte rang taka enkawl an nih theihna turin a phurhna tur kawng bik pawh ruahman niin damdawi inte pawh ngai pawimawh turin ka chah,” a ti.

A tlak hnu lawkah hian rikruma che chhuak thinten a hmun thlengin chhanchhuah, mi thiar chhuah leh kang thelh hna an thawk nghal a. “Thu leh hliam awm zat kan ngaihven mek,” tiin Deputy Commissioner of Police Kanan Desai chuan a sawi.

Air India neitu, Tata Group chuan a tuartu chhungte an tawrhpui thu an sawi a. “Tun dinhmunah chuan kan ngaih pawimawh ber chu a tuartu leh an chhungte ngaihven a ni a. Emergency response team pawh kan thawhpui a, a tul anga puih leh chhawmdawlna pawh ngaihtuahsak an ni ang,” tiin X-ah an tar lang.

He thil thleng avang hian Ahmedabad tumhmun pawh khar lailawk a ni.