Aizawl October 19, 2022 - Aizawl N-II Block Conference hmanpuitu MNF President leh Chief Minister ni bawk Zoramthanga chuan, Pathian leh kan Ram tan ti a, mi sang tamtak thisena baptist tawh MNF hi kan kalsan thiang lo a ni, a ti

Ramhlun Indoor Stadium-a Block Conference-a Khuallian Zoramthanga chuan, "Pa ber feh haw tur chuan, chhungkaw mamawh kan zawh tawk tur dapin thahnemngai takin thlawhhma kan suartluan thin a. Pathian leh kan Ram tan ti a, mi sang tamtak thisena baptist tawh MNF hi kan kalsan thiang lo a ni," a ti. 

MNF President hian ZPM leh Congress chungchang sawiin, "An hram atang chuan sakeibaknei emaw tih mai tur kha, sabengtung bawk a lo ni leh thin. Congress pawh Central leh state-a sawrkar kawp, zu chhiah la bawk chunga sum harsatna kan tawh nasat zia te kha mipuiin an la theihnghilh lo a. Tun dinhmunah Congress chu sawisel pawh a inthlahrunawm lek lek tawk zawk a ni," a ti. 

Zorama chuan, "Inthlanpui lo awm leh turah Pathianin bul min tanpui a, MLA tha tak tak beih ngaihna pawh an hriatloh te avangin MNF kan sawrkar leh ngei dawn a ni. Hunkhirh tak hnuaiah Cheng vaibelchhe tamtak kan hmuh tur ang kan hmulo chung pawha ngheilo leh buai lutuk loa kan awm thei hi Pathian tanpuina avanga sawrkar hmalakna chak tak vang a ni," a ti. Pathianin kawng chanve-ah min kalsan dawnlo a. Rinawnawm takin i bei zel ang u, tiin party mipui kalkhawmte a fuih bawk a ni. 

Khualzahawm K. Vanlalvena M.P chuan,"Tun sawrkarah rinlawkloh leh beisei lawk hauh loin, hrileng, ramri buai leh thenawm rambuai avangin harsatna lian kan hmachhawn a. Chuvang chuan kan hotuten an intiam ang leh an sawi angin an awm thei lo a ni, "a ti. 

K. Vena chuan, "Kan pian ve hmain MNF chu mumal takin a lo kal tawh a, MNF movement vangin hnamdangin kawng hrang hranga min chimral na turah humhim kan ni. Independent sual anih laiin MNF support lam apiangin thuneihna an chang thin a. Hei hian a tarlan chian em em chu, MNF hi Pathianin rorel turin a hun a ruat thin. Ram leh hnam rawngbawlna ngaihven vak lo leh awmhmuna sawisel tur zawng tam zawk te hi mi intodelh tawh te an ni tlangpui a. Keini MNF chuan mi harsa leh tanpui ngaite kan hre zel dawn a. Keima mimal hian mi hausa leh thiltitheite ka tlawn ngai dawn lo a, Min pui let thei lo tur te pawh pui zelin, opposition kan nihlai angin midang te kan party a awm turin i sawm zel ang u," a ti bawk.