ZALEN, May 10, 2025: Tun hnaia Aizawl leh a bul hnaia kopang lung tlain mihring a delh hlumna hmun hnih chu phai lam atanga mi thiam pahnih chah chhuah hovin Mizoram sorkarin a en fiah dawn.

Lengpui bula Pukpui kham leh Kulikawna Ngaizel kham phei hi Rock Excavation Engineering Research Group Chief Scientist & HoS, Dr. C. Sawmliana leh M/s Maccaferri Environmental Solutions Pvt. Ltd. Sr. Manager Manthan Chauhan hovin sorkar aiawhten an en dawn a ni.

Mi thiam pahnihte hi Thawhtanni hian Lengpui Airport-ah thlengin chawhnuah Pukpui khama lung tlakna an enfiah nghal dawn a, a tukah Ngaizel an enfiah leh ang a. Hun an neih chuan Hlimen pawh an tlawh ang.

Mi thiam pahnihten hmun an en fiahnaah hian PWD Chief Engineer (Road) Sr. EE Er. Lalbiaksangi; Geology & Mining Jt. Director, Er. Lalremmawia; MZU Associate Professor Dr. Laldinpuia; Zone XVII Zonal Officer Dr. Lalchamliani leh Zone XII Zonal Officer Dr. Robert Lalrinsanga te bakah PWD Highway Div I Sr. EE; DM&R, Geology & Mining Department aiawhte leh khawtlang hruaituten an tawiawm ang.