ZALEN May 21, 2025 : Social Welfare Minsiter Lalrinpuii chuan vawiin khan Aizawl-a home lian pahnih Operation Kingdom Ministry (OKM) leh TBCC hotute kawmna a nei a, he hunah hian Home pahnih te dinhmun in hrilh hriatna leh an kalphung te sawiho a ni, sawrkar kaihhruaina hnuaia kal tha an tih thu home enkawltute hian an sawi.

Phunchawng-a inkulh Operation Kingdom Ministry (OKM) hotute ruihhlo ngaite Pathian thu zirtirna an kalpui a, thla 7/8 te an course hi a ni thin an ti a, tunah hian mi 400 an awm mek an ti. OKM hian inkaihhruaina felfai takin ruihhlo ngai sim tawhte chu Senior Resident atangin worker-ah, chuta tangin Executive ah leh Ob-ah te an tang chhova, an chungah hian Adviser te an awm leh bawk thu minister hi an hrilh.

OKM hotute chuan Firms & Societies Act hnuaiah in register-in mi inphalte donation pek khawm atanga kal an ni ber an ti a. Chumi rualin an zirlaite hi a huho ten an inhlawh thin a, insakna hna hrang hrang te, kawng siamna ah te, lungrem hnate an thawk thin. Vawk leh ar an vulh bakah thlai huante an siam bawk an ti.

Minister hian TBCC founder TT Zohmingthanga leh TBCC Advisory Board hotute kawmna hun a nei bawk a. TBCC tha zawk, langtlang zawk leh inkaihhruaina mumal zawk nena kalpui dan tur an sawiho a. TBCC lam pawh hian dan hnuaia mumal taka kal chu an duhdan anih thu leh lawmawm an tih thu an sawi.

TBCC hi a rang thei ang bera tuna ruihhlo ngai haw na tur nei lova khawlai a tei rawlai te lo enkawl leh turin ruahmanna siampui an ni a. Anni hian, admission mumal zawka tih leh a hmun hmain a zawh tawk damlo la turin an inruahman dawn a. TBCC advisory Board Vanhela Pachuau Chairman-na hnuaiah uluk zawkin an vil tawh dawn tih an sawi bawk.

Sawrkar chuan dan angin accreditation a kalpui tawh dawn tih an hrilh a, chu dan hnuaia minimum standards zawm tur awmte an zawm theih nan sawrkarin center te training pek a, kawng hrang hranga puih a tum thu leh Kohhran hrang hrang hruaitute pawh puitu tura sawm an nih thu Minister hian OKM leh TBCC hotute hi a hrilh a. Anni lam pawhin dan hnuaia inkaihhruaina mumal tak nena kal a ni tur chu an lawm thu leh Sawrkar, Kohhran leh NGO te nena thawh tlan chu an duhthusam anih thu an sawi a ni.