ZALEN May 9, 2025: Vawiin khan Mizoram Health Care Society buatsaihin Performance review meeting on MUHCS Implementation neih a ni a. He hun hi Health Minister Lalrinpuii chuan khuallian niin a hman pui a, Mizoram hmun hrang hranga Community Health Centre leh Primary Health Centre a thawktuten MUHCS an kalpui dan chungchanga an hmalakna leh harsatna tawhte an sawi ho a ni.

Health Minister chuan Mipui hmangaih vanga Mipui Health Care hi duan a nih thu a sawi a. Awlsam zawng ngaihtuah ni ila reimbursement an kalpui thei reng a. Mahse, mipui hmakhua an ngaih avangin Cashless kalpui a ni a ti. Lalrinpuii chuan, mipui sawrkar, mipui ta, mipui tana ding Sawrkarin mipui tana Health Care system hi a duan a nih tlat avangin a hlawhtlin chhoh zel a beisei thu a sawi.

Sawrkar chuan theihtawpin Sawrkar damdawiin-te a thuam that zel thu sawiin Lalrinpuii chuan, "Nurse 300 lak belh an ni a, multi task worker 100 lak thar an ni a, X Ray technician, lab technician leh Public Relations Officer(PRO) te thlengin lak belh an ni a. Health Worker 100 lak belh a ni dawn mek bawk a, infrastructure lamah pawh Nabard hnuaiah PHC leh sub centre engemaw zat sak that a ni dawn. JICA hnuaia cancer superspeciality hospital kan neih tur chu kalpui mek a ni," a ti.

ZMC hnuaia ICU 13 siam belh tur te, Cardio thorasic leh neuro surgery unit din thar tur te, Aizawl Civil Hospital a Kidney transplant lam din tura hmalak mek a nih thu te, IVF centre level 1 license pek a nih dante a tarlang a, Sawrkarin theihtawp a chhuah avangin PHC/CHC te chu mipui hmangaihna nen, tun aia nasa lehzuala tan la turin a fuih bawk a ni.