April 11, 2025; Nizan khan police in Heroin hawng 440 an man chungchanga inhnamhnawiha puh Aizawl Dinthar venga Henry Lalbiakzinga Chhundeng te in leh an lirthei te chu thalai rualin an suasam a, an lirthei car leh two wheeler te chu an tichhe nasa hle.

A zan thum nan thalai rualte chu nizan dar 9 vel atang khan Henry-a te in kawtah hian an pungkhawm leh a, an in bul vel light off vek a ni a, Hawng 440 kan duh lo, Dinthar Veng chhung chhuahsan rawh se tite in an au rual a, mipui an pungkhawm tam tawlh tawlh a, police te pawh an thlen belh zel a, pungkhawm te chuan Henrya te In gate chu tichhiain, an garage-a Car pahnih darthlalang bakah bike 2 leh scooty te an suasam a, bike pahnih leh scooty te hi gate pawnah hnuk chhuakin an rap chhe hneh hle a. Henrya te In chhung tak erawh an luh chilh lo a ni. Mipui pungkhawm hi zan lai dar 1 bawr velah an tindarh thei chauh a ni.

Tarlan tawh angin thawhlehni zan khan thalai rualte Dinthar kawn leh Henrya te in bulah pung khawmin ruihhloa sumdawn an duhloih thu an lo auchhuahpui tawh a, nilaini zan khan pungkhawm lehin hawng 440 an duh loh thu an au pui leh a, nizan khan an pungkhawm lehin nizana pungkhawmah hi chuan Dinthar veng pawn atanga tel an tam tawh hle nia hriat a ni.

Dinthar YMA hruaitute chu thawhlehni zan khan thukhawmin ruihhlo man chungchanga inhnamhnawiha puh Henrya te chhungkaw chungchang hi an ngaihtuah a, YMA membership fee leh chhiatni fund an pek te chu an pe kir a. Dinthar Local Council huaihawtin All NGO thukhawm lehin an rel angin vawiin Zirtawpni chawhma dar 11 atang hian anmahni veng chhungah ruihhlo dona kawng zawh an nei dawn.