Aizawl : Mission Veng chuan an veng kum 125-na an lawmna kal mekah vawiin October 20 khan Exhibition an tan. Exhibition hi Mission Veng Kohhran Gospel Centenary Building-ah neih a ni.

Exhibition-ah hian thlalak hlui leh bungraw hlui chi hrang hrang pho lan a ni a; thlalak 500 vel leh bungrua 39 pho lan a ni. Exhibition hi a duh apiang tan tlawh theih a ni a, tlawh turin Mission Veng khawtlang chuan mi tin an sáwm a ni.

Mizorama sap missionary hmasa Rev. FW Savidge (Sapupa), Rev. JH Lorraine (Pu Buanga) leh Rev. DE Jones (Zosaphluia) te chu October 23, 1897 khan Thingpuihuan Tlang (MacDonald Hill) atangin tuna Mission Venga Banglapui hmunah hian an insuan a, an insuan ní chu Mission Veng din tan ní-ah pawm a ni. Zosaphluia hi hun rei tak Mission Vengah a awm zui a, Sapupa leh Pu Buanga te erawh chuan December 31, 1897 khan Mizoram an chhuahsan thung.

Exhibition hawnna inkhawm hi Upa Rinzawna'n kahhruaiin, MHIP Mission Veng Branch President Hmingliani'n a hawng. Exhibition hi vawiin leh naktukah chhunzawm a ni dawn a, zan lamah pawh dar 9:00 thleng hawn thin a ni ang.

Mission Veng kum 125 lawmna hi September 8, 2022 khan hawn a ni a, hawn a nih atangin kawng hrang hrangin an lawm tawh a, a lawmna pui ber chu tun kar Inrinni, October 22 hian neih a ni dawn a; zing karah Banglapui tualah jubilee dár vuak a ni ang a, chawhma dar 10:00-ah jubilee lungphun hawn a ni dawn a, chawhma dar 10:30 atangin nilengin Mission Veng Kohhran Hall-ah a lawmna hun hman a ni ang.