ZALEN May 16, 2025 : Social Welfare & Tribal Affairs, Women & Child Development Department changtu Minister Lalrinpuii chuan kumin HSLC leh HSSLC result chhuaka mitdel zirlai hlawhtlinna chang Durtlang Special Blind School-a awmte chawimawina hun Special Blind School Durtlang hmuna neih chu nimin khan khuallian niin a hmanpui a, lawmpuina pawisafai Rs. 20000/ a hlan nghal bawk a ni.

Durtlang Special Blind School hi Samaritan Association for the Blind ten May 1, 2001 khan an din a. Kumin HSLC leh HSSLC result chhuakah khan candidate pakhat ve ve neiin, hlawhtlinna an chang ve ve a ni. He school atang hian mi 34-in HSLC zo tawhin, Sawrkar hnathawk 14 vel an awm tawh a. Kumin (2025) hian he school-a inziak lut hi Primary-ah mi 16, Middle School-ah mi 11 leh High School-ah mi 6- an zavaiin mi 33 an ni a. Zirlai naupangte hi Mizoram bakah Assam, Tripura, Manipur leh Myanmar atanga lo kalte pawh an awm a ni.