ZALEN May 12, 2025 : DM&R Minister Prof. Lalnilawma , hmalakna hnuaiah vawiin khan Maccaferri Geo-technical Solutions Pvt Ltd-a Sr. Manager Er. Manthan Chauhan leh Dr. C. Sawmliana, Chief Scientist, Council of Scientific & Industrial Research - Central Institute of Mining & Fuel Research (CSIR-CMIR) te chu Aizawl-ah chah thleng an ni.

Mithiamte hian Pukpui - Lengpui, Ngaizel phei leh Hlimen leimin/ lung tlak thinna hmun leh a hmundang him lo lai te enfiah tur leh mipui tana hmun him zawk a siamna tur kawng ruahhmanna an siam dawn a ni. Aizawl District Bawrhsap Er Lalhriatpuia kaihhruaiin Lengpui kawnga Pukpui lungtlak hlauhawmna hmun chu enho nghal a ni.

He enho na ah hian CEO, ADDMA, PWD, DM&R Department, Geology & Mining Department, MZU a Geologists, I&PR Department, V.C leh YMA, Lengpui aiawh te an tel a ni.

Maccaferri company hi Italian Company niin 1879 khan din a ni a, tunlaia leimin dawl nana hman nasat ‘Gabion wall’ pawh hi 1893-a an hmuh chhuah a ni. Khawvel ram 140 chuanga lung tlak hlauhawmna hmunah te thawm that hna an lo thawk tawh thin bawk.

Naktuk hian Ngaizel leh Hlimen lungtlak hlauhawmna hmun te chu a hmunah en pui an ni ang a, tlai lamah DM&R Minister ho a meeting neih nghal tura ruahman a ni.