ZALEN June 23, 2025 : Haulawng lal Saihranga fapa, Ngurliana Sailo chu June 21, 2025 khan Apollo Hospital, Kolkata-ah a thi a, June 22, 2025 khan an lalna khua Haulawng-ah phurh thlen niin June 23, 2025 hian Haulawng khua chuan an lal hlui fapa hi zahna famkim nen an khaw thlawnmualah an thlah liam. Haulawng lal fate leh an nupui ten Haulawng-ah phum an duh tih Haulawng kartin chhuak chanchinbu LAWHLENG Editor chuan ZALEN a hrilh.

LAWHLENG Editor Lahmachhuana Ralte chuan, 1954-a Mizo lal te ban an nih khan anni pawh hi ban zingami kha an ni a, tunhmaa an lal in pawh hi sak that a ni tawh a, an tunu te chhungkua in an luah mek a ti. Haulawng lal fanu Saithangi, Lunglei chuan Haulawng-ah phum a duh thu Haulawng atanga thudawnna chuan a sawi a, SL Sailova te nupa, Upper Republic pawhin an pa/pu te lalna thin naah hian phum an duh niin a sawi bawk.

Ngurliana Sailo hi an unau zinga naupang ber niin April 28, 1946 khân Haulawngah a piang a. A pa chu Saihrânga (L), Haulawng lal niin a nu chu Chawngtluangi (L) a ni. An unau chu:

1. Romana (L), H/o Hmingthangi, Lunglei

2. Saithangi W/o V Vânchhûma (L), Lunglei

3. SL Sailova, H/o Saizikpuii Sailo, Upper Republic, Aizawl

4. Hmingliani (L), W/o B Saikhûma (L), Haulawng

5. Ngûrliana Sailo, H/o Ringzuali, Upper Republic, Aizawl

Kum 1971 khân Ringzuali nên inneiin fa pali an nei a, tû paruk an nei tawh a ni. An fate chu:

1. Biakngaihawmi Sailo, lawng

2. Lalduhawmi Sailo, ai

3. Saichâmpuii Sailo, W/o Vânneihtluanga Hmar

4. Lalzâmmawia Sailo, H/o Lalbiakpuii Zadêng

ZIRNA: Haulawngah Primary School kalin a zir zo a; Hmuntlângah Middle School kal lehin Pûkpui ațangin Govt. High School, Lungleiah High School a kal leh a ni.

Matric a pass hnuah St. Edmund's College, Shillong-ah In-termediate of Science a zir chhunzawm a. A pass hnua B Sc a zir laiin Assam Public Commission hnuaiah Forest Ranger-ah a tling a; Assam Civil Service-ah pawh a inziak tling bawk. Mahse, Forest Ranger hna hi thlang zâwkin Dehradun-ah train-ing a zo a. Soil & Water Conservation Department-ah thawkin Director-in a pension a ni.

Amah hi lehkha thiam thei tak leh rilru chak tak a ni a; lehkha zir vak lo pawha a zirlai hre thei êm êm si a ni. A châk ber thin chu Pilot nih a ni a; mahse, lal compensation dawng hman loa harsa taka mahni intum chawpa lehkha zir a ni a; a tum leh nih châk ber pawh a ti puitling thei lo a ni.

HNA THAWH: Ngûrliana Sailo hi kum 1971 April ni 1-ah Assam sorkar hnuaia Soil & Water Conservation Department-ah Ranger (RO)-in a lût a, Durtlângah post a ni. A hnaah kai sâng chho zêlin Director-a hlân kai a ni a; June 2009 June thlaah a pension a. A hna hi pawh seisak theih a nih laiin amah hian a duh lo a ni.

Ei rûk tum miah lo mi a ni a. Sorkar hna a thawh chhûngin, amah leh a nupui fanaute tân Medical Re-imbursement (MR) pawh vawi khat mah a bill lo. Transfer and posting chungchângah pawh harsatna a siam ngai lo a, an hotuten an dahna hmunah lungawi takin a kal mai thîn. Mahni chhûngte a duhsak bîk ngai lo a; mi dang tân erawh theih tâwp a chhuah thîn.

A MIZIA: Ngûrliana Sailo hi Mizo pâ tak, mi inngaitlâwm

leh mi tlâwmngai tak a ni a. Mi harsa leh tanpui ngaite tanpui hi nuam a ti a, a rilruah chapona leh induhna emaw, officer a nih avânga intih lalna ang mizia emaw a pu ngai lo. A hna thawhna lamah Director lai ni mah se, mi tû pawhin an biak-pawh theih tûra inphah hniam reng thei mi a ni a; amah dâwrtute leh a hote tâna biak hrehawm tûr khawpin a inti lal ngai lo.

A NAT DÂN: Kumin January thla khân a nghâwnga bâwk awm chu nâ tiin a insawisêl tan a. Aizâwl Civil Hospital-ah a inentîr a. Khâwl tha zâwka en tûrin Kolkata-a Tata Cancer Hospital pan tûra tih (refer) a ni a. February ni 17-ah Kolkata panpui a ni a; a nghâwng chu cancer a ni tih hmuh chhuah a ni.

Doctor-ten inentîr leh tûra an tih hma zân, February 19 khân a stroke hlauh mai a. Emergency-in Neuroscience damdawi in panpui nghâl a ni a, a cancer enkawl dam hnua enkawl leh tûra tih a ni. Hemi hnu hian a nghâwng cancer chu enkawl zui niin chemotherapy vawi hnih an khai a; vawi 30 hem a ni bawk. A cancer hi a chak êm avângin hmasâwn lam aiin chak loh lam a pan zêl a. Natna dang dangin a lo tlâkbuak ve zêl bawk nên; June 21, 2025, Inrinni zân dâr 7:17 khân, Apollo Hospital, Kolkata-ah a Lalpa hnêna châwl tûrin he khawvêl hi min lo chhuahsan ta a ni.